2026-ஆம் ஆண்டின் முதல் சூரிய கிரகணம் இன்று (17) செவ்வாய்க்கிழமை நிகழ்கிறது. இது ஒரு ‘வளைய சூரிய கிரகணம்’ (Annular Solar Eclipse) ஆகும். சந்திரனுக்கும் சூரியனுக்கும் இடையிலான தூரம் மற்றும் கோணங்களின் அடிப்படையில், சந்திரன் சூரியனை முழுமையாக மறைக்காமல் அதன் மையப்பகுதியை மட்டும் மறைக்கும். இதன் போது சூரியனின் விளிம்புகள் ஒரு பிரகாசமான தங்க மோதிரம் போலத் தெரிவதால், இது “நெருப்பு வளையக் கிரகணம்” (Ring of Fire) என்று அழைக்கப்படுகிறது.
இந்த முழுமையான வளையக் காட்சியை அண்டார்டிகாவின் ஒரு சிறிய பகுதியில் மட்டுமே காண முடியும். குறிப்பாக அண்டார்டிகாவின் கொன்கோர்டியா நிலையத்தில் (Concordia Station) உள்ளூர் நேரப்படி மாலை 6:48 மணிக்கு ஆரம்பமாகி, 7:47 மணிக்கு உச்சத்தை அடையும். மேலும் ஆப்பிரிக்காவின் தெற்குப் பகுதிகள் (தென்னாப்பிரிக்கா, நமீபியா), தென் அமெரிக்கா (சிலி, அர்ஜென்டினா) மற்றும் அண்டார்டிகாவின் ஏனைய பகுதிகளில் இது பகுதி நேரக் கிரகணமாகத் தென்படும். உலகின் மொத்த மக்கள் தொகையில் சுமார் 2% பேர் மட்டுமே இதனை நேரடியாகக் காணும் வாய்ப்பைப் பெற்றுள்ளனர்.
இந்தச் சூரிய கிரகணம் இந்தியாவிலோ அல்லது இலங்கையிலோ நேரடியாகத் தெரியாது. இந்திய நேரப்படி (IST) இது இன்று பிற்பகல் 3:26 மணிக்குத் தொடங்கி, இரவு 7:57 மணி வரை நீடிக்கும். கிரகணத்தின் உச்சக்கட்டம் மாலை 5:42 மணி அளவில் நிகழும். ஆசிய நாடுகள் இந்த நிழல் பாதையில் வராததால், ஆர்வலர்கள் நாசா (NASA) போன்ற விண்வெளி ஆய்வு நிறுவனங்களின் நேரலை ஒளிபரப்பு மூலம் இந்த அரிய நிகழ்வைக் கண்டு ரசிக்கலாம்.
இந்த ‘நெருப்பு வளைய’ காட்சி அதிகபட்சமாக 2 நிமிடங்கள் 20 விநாடிகள் வரை நீடிக்கும். இந்த ஆண்டின் அடுத்த முக்கியமான சூரிய கிரகணம் ஆகஸ்ட் 12, 2026 அன்று நிகழும்; அது ஒரு ‘முழு சூரிய கிரகணமாக’ (Total Solar Eclipse) இருக்கும். மேலும், இன்றைய கிரகணத்தைத் தொடர்ந்து 2027-ஆம் ஆண்டு பிப்ரவரி 6-ஆம் திகதி மீண்டும் ஒரு வளைய சூரிய கிரகணம் நிகழும் என சர்வதேச வானியல் வல்லுநர்கள் கணித்துள்ளனர்.
