அக்குரேகொட பகுதியில் சட்டத்தரணி ஒருவரும் அவரது மனைவியும் மிலேச்சத்தனமாகச் சுட்டுக்கொல்லப்பட்ட சம்பவத்திற்கு எதிர்ப்புத் தெரிவிக்கும் வகையில், இலங்கையின் அனைத்து சட்டத்தரணிகளும் இன்று (16) நீதிமன்ற நடவடிக்கைகளிலிருந்து விலகி அடையாளப் போராட்டத்தை முன்னெடுத்துள்ளனர். இதனால் நாடு முழுவதும் உள்ள நீதிமன்றப் பணிகள் ஸ்தம்பிதமடைந்துள்ளன.
இலங்கை சட்டத்தரணிகள் சங்கத்தின் (BASL) தலைவர் ராஜீவ் அமரசூரிய தலைமையில் நேற்று (15) மாலை நடைபெற்ற விசேட பொதுச்சபைக் கூட்டம் ஒரு வரலாற்றுப் பதிவாக அமைந்தது. கடந்த 14 ஆண்டுகளில் இல்லாதவாறு சுமார் 3,500 சட்டத்தரணிகள் இதில் பங்கேற்றனர். இடவசதி பற்றாக்குறை காரணமாகப் பெருமளவிலானோர் Zoom தொழில்நுட்பம் ஊடாக இணைந்துகொண்டனர். இக்கூட்டத்தில் ஏகமனதாக எடுக்கப்பட்ட நான்கு முக்கிய தீர்மானங்கள் வருமாறு:
கொலைக்கு எதிர்ப்புத் தெரிவித்து இன்று (16) ஒரு நாள் அடையாளமாக அனைத்து நீதிமன்ற நடவடிக்கைகளிலிருந்தும் விலகி இருத்தல்.
நாட்டில் மீண்டும் தலைதூக்கியுள்ள கொலைக் கலாசாரத்தை ஒழித்து, பொதுமக்களின் பாதுகாப்பை உறுதிப்படுத்த அரசாங்கத்தை வலியுறுத்தல்.
குற்றவாளிகள் அனைவரையும் தாமதமின்றி கைது செய்ய காவல்துறையினருக்கு அழுத்தம் கொடுத்தல்.
தவறான தகவல்களுக்கு கண்டனம்: வழக்குத் தொடர்பாக உறுதிப்படுத்தப்படாத தகவல்களைக் கசியவிடும் காவல்துறை மற்றும் பிற தரப்பினர் மீது அதிருப்தி வெளியிடுதல்.
நீதியை நிலைநாட்டும் ஒரு சட்டத்தரணிக்கே நாட்டின் தலைநகருக்கு அருகில் இந்தப் பாதுகாப்பு அச்சுறுத்தல் என்றால், சாதாரண குடிமகனின் நிலை என்ன? என்ற கேள்வியைச் சட்டத்தரணிகள் சங்கம் எழுப்பியுள்ளது. இந்த இரட்டைக் கொலைச் சம்பவம் ஒட்டுமொத்த சட்டத்துறையினரையும் அதிர்ச்சியில் ஆழ்த்தியுள்ளதாகத் தெரிவித்த ராஜீவ் அமரசூரிய, அரசாங்கம் உடனடியாகப் பதிலளிக்கத் தவறினால் போராட்டங்கள் தீவிரமடையும் என எச்சரித்தார்.
