மத்திய கிழக்கில் நிலவி வரும் போர் மற்றும் ஈரான் மீதான இராணுவத் தாக்குதல்களைக் கருத்திற்கொண்டு, ஈரானியப் பிரஜைகள் அவுஸ்திரேலியாவிற்குள் நுழைவதை ஆறு மாத காலத்திற்குத் தற்காலிகமாகத் தடை செய்ய அவுஸ்திரேலிய மத்திய அரசு தீர்மானித்துள்ளது. இது தொடர்பான உத்தியோகபூர்வ அறிவிப்பை அந்நாட்டு உள்துறை அமைச்சர் டோனி பர்க் (Tony Burke) வெளியிட்டுள்ளார். ஈரானில் நிலவும் கடும் மோதல் சூழலால், தற்காலிக விசாக்களில் அவுஸ்திரேலியாவிற்கு வருபவர்கள் தமது விசா காலம் முடிந்த பின்னரும் நாடு திரும்ப முடியாத அல்லது நாடு திரும்ப விரும்பாத பாதுகாப்பற்ற நிலை ஏற்படலாம் என்ற கவலையிலேயே இந்த நடவடிக்கை எடுக்கப்பட்டுள்ளது.
ஈரானினால் அண்மையில் ஏவப்பட்ட ஆளில்லா வானூர்திகள் மற்றும் ஏவுகணைத் தாக்குதல்கள் பிராந்திய அமைதியைச் சீர்குலைத்துள்ளதாகக் குறிப்பிட்டுள்ள அவுஸ்திரேலிய அரசு, பாதுகாப்பு மற்றும் குடிவரவு விதிகளின் அடிப்படையிலேயே இந்தத் தடையை விதித்துள்ளது. மத்திய கிழக்கின் பல நாடுகள் இத்தாக்குதல்களுக்கு இலக்காகியுள்ளதாக உறுதிப்படுத்தியுள்ள நிலையில், அவுஸ்திரேலியாவின் தேசிய பாதுகாப்பினை உறுதிப்படுத்தும் நோக்கில் இத்தீர்மானம் மேற்கொள்ளப்பட்டுள்ளது. இந்தத் தற்காலிகத் தடை உடனடியாக அமுலுக்கு வருவதாகச் சர்வதேச ஊடகங்கள் செய்தி வெளியிட்டுள்ளன.
மத்திய கிழக்கில் போர் தீவிரமடைந்து வரும் நிலையில், அவுஸ்திரேலியாவின் இந்த அதிரடி அறிவிப்பு சர்வதேச விசா நடைமுறைகளில் பெரும் மாற்றங்களை ஏற்படுத்தக்கூடும் என எதிர்பார்க்கப்படுகின்றது. ஏற்கனவே பல நாடுகள் ஈரான் மீதான பயணக் கட்டுப்பாடுகளை இறுக்கியுள்ள நிலையில், அவுஸ்திரேலியாவின் இந்த முடிவு ஈரானியப் பிரஜைகளின் சர்வதேசப் பயணங்களில் பெரும் தாக்கத்தை ஏற்படுத்தும். இப்போர் சூழல் தணியும் வரை குடிவரவு விதிகள் இதேபோன்று கடுமையான முறையில் பின்பற்றப்படும் என அந்நாட்டு உள்துறை அமைச்சு மேலும் சுட்டிக்காட்டியுள்ளது.
