‘டிட்வா’ (Ditwah) புயல் காரணமாக ஏற்பட்ட கடும் வெள்ளப்பெருக்கினால் முற்றாகச் சேதமடைந்திருந்த முல்லைத்தீவு – நாயாறு பிரதான பாலத்தை, இலங்கை இராணுவ பொறியாளர் படையினர் மிகக்குறுகிய காலத்தில் புனரமைத்து மக்கள் பயன்பாட்டிற்காகத் திறந்து வைத்துள்ளனர்.
பாலம் உடைந்ததன் காரணமாக முல்லைத்தீவு – வெலியோயா, முல்லைத்தீவு – திருகோணமலை மற்றும் முல்லைத்தீவு – கொக்கிலாய் ஆகிய முக்கிய பாதைகளுக்கிடையிலான போக்குவரத்து முற்றாகத் தடைப்பட்டது.
இதனால் பல கிராமங்கள் வெளிஉலகத் தொடர்பின்றித் தனிமைப்படுத்தப்பட்டதுடன், அத்தியாவசியத் தேவைகளுக்காகப் பொதுமக்கள் பெரும் சிரமங்களை எதிர்கொண்டனர்.
நிலைமையின் பாரதூரத்தைக் கருத்திற்கொண்டு, இராணுவப் பொறியாளர் படையினர் களமிறக்கப்பட்டு அவசர புனரமைப்புப் பணிகள் முன்னெடுக்கப்பட்டன:
120 அடி நீளமுடைய, இரு வழிப் போக்குவரத்தை மேற்கொள்ளக்கூடிய ‘Compact 100’ ரகக் கனரகப் பாலம் (Bailey Bridge) அங்கு அமைக்கப்பட்டது. கடினமான காலநிலைக்கு மத்தியிலும் இராணுவத்தின் இந்தத் துரித முயற்சியால், வட பிராந்தியத்தின் போக்குவரத்து இணைப்பு மீண்டும் இயல்பு நிலைக்குக் கொண்டு வரப்பட்டுள்ளது.
பாதிக்கப்பட்ட மக்கள் இராணுவத்தின் இந்த மனிதாபிமான மற்றும் துரிதமான சேவைக்குத் தமது நன்றிகளைத் தெரிவித்துள்ளனர்.
