கடந்த 2019-ஆம் ஆண்டு பிப்ரவரி 14-ஆம் திகதி, ஜம்மு-காஷ்மீரின் புல்வாமா மாவட்டத்தில் சி.ஆர்.பி.எப் வீரர்கள் சென்ற வாகன வரிசை மீது நடத்தப்பட்ட தற்கொலைப்படை தாக்குதலில் 40 வீரர்கள் வீரமரணம் அடைந்தனர். இந்திய வரலாற்றில் மறக்க முடியாத இந்தத் துயரச் சம்பவத்தின் ஏழாம் ஆண்டு நினைவு தினம் இன்று அனுசரிக்கப்படுகிறது.
பிரதமர் நரேந்திர மோடி இன்று காலை தனது ‘எக்ஸ்’ (X) தளத்தில் வெளியிட்டுள்ள பதிவில், “2019-ஆம் ஆண்டு இதே நாளில் புல்வாமாவில் தங்கள் இன்னுயிரை ஈந்த துணிச்சலான வீரர்களை நினைவு கூர்கிறேன். அவர்களின் தேசபக்தி, உறுதிப்பாடு மற்றும் தேசத்திற்கான சேவை நம் உணர்வில் என்றென்றும் பதிந்திருக்கும். ஒவ்வொரு இந்தியரும் அவர்களின் துணிச்சலைக் கண்டு உத்வேகம் பெறுகின்றனர்” என நெகிழ்ச்சியுடன் குறிப்பிட்டுள்ளார்.
எதிர்க்கட்சித் தலைவர் ராகுல் காந்தி, “தாய்நாட்டின் பாதுகாப்பிற்காகத் தன்னுயிரைத் தியாகம் செய்த வீரர்களுக்கு எனது இதயப்பூர்வமான அஞ்சலிகள். அவர்களின் தியாகத்திற்கு தேசம் என்றும் கடமைப்பட்டுள்ளது” எனத் தெரிவித்துள்ளார்.
மத்திய உள்துறை அமைச்சர் அமித்ஷா மற்றும் பாதுகாப்புத் துறை அமைச்சர் ராஜ்நாத் சிங் ஆகியோரும் வீரர்களுக்கு அஞ்சலி செலுத்தினர். பயங்கரவாதத்திற்கு எதிராக மோடி அரசு ‘ஜீரோ டாலரன்ஸ்’ (Zero Tolerance) கொள்கையுடன் செயல்படுவதாகவும், வீரர்களின் தியாகம் ஒருபோதும் வீண் போகாது என்றும் அமித்ஷா மீண்டும் உறுதிபடத் தெரிவித்துள்ளார்.
புல்வாமாவின் லெத்போரா பகுதியில் அமைந்துள்ள சி.ஆர்.பி.எப் நினைவிடத்தில் இன்று காலை சிறப்பு அஞ்சலி மற்றும் மலர்வளையம் வைக்கும் நிகழ்வு நடைபெற்றது. மூத்த அதிகாரிகள் மற்றும் பாதுகாப்புப் படை வீரர்கள் இதில் கலந்துகொண்டு வீரமரணம் அடைந்தவர்களுக்கு ராணுவ மரியாதையுடன் அஞ்சலி செலுத்தினர். சமூக வலைதளங்களில் பலரும் #PulwamaAttack மற்றும் #BlackDay ஆகிய ஹேஷ்டேக்குகளின் கீழ் வீரர்களுக்கு வீரவணக்கம் செலுத்தி வருகின்றனர்.
