தாய்லாந்தில் வரலாற்றுச் சிறப்புமிக்க மத மற்றும் கலாச்சார நிகழ்வாக, பத்து விதிகளைத் (தச-சிலா) தற்காலிகமாகக் கடைப்பிடிப்பதற்காக இலங்கையைச் சேர்ந்த 50 பெண்கள் அடங்கிய குழுவினர் தாய்லாந்துக்கு வருகை தந்துள்ளனர். சமீபத்திய ஆண்டுகளில் இலங்கைப் பெண்கள் குழுவினர் தாய்லாந்தில் இத்தகையதொரு ஆன்மீக நிகழ்வில் பங்கேற்பது இதுவே முதல்முறை என்பதால், இது இரு நாடுகளுக்கும் இடையிலான மதப் பிணைப்பை உறுதிப்படுத்தும் ஒரு மைல்கல்லாகக் கருதப்படுகிறது.
சர்வதேச மகளிர் தினத்தை முன்னிட்டு, பாங்காக்கில் உள்ள புகழ்பெற்ற வாட் தம்மமோங்கோல் (Wat Dhammamongkol) கோயிலின் தலைமைக் குருவான அதி வணக்கத்திற்குரிய பிரசாமு பைரோஜ் ஒபாசோ தேரரின் வழிகாட்டலில் இந்த நிகழ்வு சிறப்பாக நடைபெற்றது. நிகழ்வில் தாய்லாந்திற்கான இலங்கைத் தூதுவர் விஜயந்தி எதிரிசிங்க பிரதம விருந்தினராகக் கலந்துகொண்டார். அப்போது அவர், இலங்கைக்கும் தாய்லாந்துக்கும் இடையிலான நீண்டகால மத மற்றும் கலாச்சார உறவுகளைச் சுட்டிக்காட்டியதுடன், இத்தகைய ஆன்மீகப் பரிமாற்றங்கள் இரு நாட்டு மக்களின் உறவையும் ஆன்மீகப் பயிற்சிகளையும் வலுப்படுத்தும் என்று எடுத்துரைத்தார்.
இந்த ஆன்மீக நிகழ்ச்சி, இலங்கை பங்கேற்பாளர்களுக்கு தாய்லாந்தின் பாரம்பரிய பௌத்த துறவியர் மரபுகளை நேரில் அனுபவிப்பதற்கும், பத்து விதிகளைக் கடைப்பிடித்து தங்கள் ஆன்மீக பயிற்சியை ஆழப்படுத்துவதற்கும் ஒரு சிறந்த வாய்ப்பாக அமைந்துள்ளது. இந்த நிகழ்வின் ஒரு பகுதியாக, குறித்த குழுவினர் சியாங் மாய் (Chiang Mai) மாகாணத்தில் உள்ள அமைதியான சூழல் கொண்ட வாட் பா சோம்தேஜ் ஃபிரா யானவச்சிரோடோமுக்கு (Wat Pa Somdej Phra Yanawachirodom) பயணமாகியுள்ளனர்.
அங்கு அவர்கள் அடுத்த 49 நாட்கள் (ஏழு வாரங்கள்), அந்த விகாரையில் வசிக்கும் தாய்லாந்து பௌத்த துறவிகளின் வழிகாட்டலின் கீழ் புத்த தியானத்தைக் கற்றுக்கொள்ளவும், அதனைத் தமது அன்றாட வாழ்வில் நடைமுறைப்படுத்தவும் பயிற்சி பெறவுள்ளனர். பௌத்த மதத்தின் விழுமியங்களைப் போற்றிப் பாதுகாக்கும் இந்த முயற்சி, இலங்கைப் பெண்களின் ஆன்மீகப் பயணத்தில் ஒரு புதிய பரிமாணத்தை ஏற்படுத்தியுள்ளதாகத் தாய்லாந்து வாழ் பௌத்த அறிஞர்கள் பாராட்டு தெரிவித்துள்ளனர்.
