கொழும்பு ஆர். பிரேமதாச மைதானத்தில் நேற்று முன்தினம் (15) நடைபெற்ற வரலாற்றுச் சிறப்புமிக்க இந்தியா – பாகிஸ்தான் டி20 உலகக் கிண்ணப் போட்டியைக் காண்பதற்காக, 15 தனியார் ஜெட் விமானங்களில் உலகெங்கிலும் இருந்து ஏராளமான முக்கியப் பிரமுகர்கள் மற்றும் ரசிகர்கள் கட்டுநாயக்க சர்வதேச விமான நிலையத்தை வந்தடைந்தனர். இந்த வருகையானது இலங்கையின் விளையாட்டுச் சுற்றுலாத்துறைக்கு ஒரு பாரிய உத்வேகத்தை அளித்துள்ளது.
கடந்த 14-ஆம் திகதி முதல் இந்தியா, பாகிஸ்தான் மற்றும் பல்வேறு நாடுகளில் இருந்து இந்த விசேட விமானங்கள் வந்திறங்கின. இந்த விஐபி விருந்தினர்களில் பாகிஸ்தான் விளையாட்டுத் துறை அமைச்சர் தலைமையிலான குழுவினர், சர்வதேச கிரிக்கெட் பேரவையின் (ICC) தலைவர் ஜே. ஷா மற்றும் உலகப்புகழ் பெற்ற பல கோடீஸ்வர வர்த்தகர்கள் அடங்குவர். இவர்கள் அனைவரும் போட்டியைப் பார்த்து ரசித்த பின்னர், தற்போது மீண்டும் இலங்கையிலிருந்து புறப்பட்டுச் சென்றுள்ளனர்.
பல்வேறு சர்ச்சைக்குரிய சூழல்களுக்கும், ரசிகர்களின் பெரும் எதிர்பார்ப்புகளுக்கும் மத்தியில் நடைபெற்ற இந்தப் போட்டியில் இந்திய அணி அபாரமான ஆட்டத்தை வெளிப்படுத்தியது. பாகிஸ்தான் அணியை 61 ஓட்டங்கள் வித்தியாசத்தில் வீழ்த்தி, இந்திய அணி தனது ஆதிக்கத்தைச் செலுத்தியது. மைதானத்தில் நிலவிய விறுவிறுப்புக்கு இணையாக, வானூர்தி நிலையத்திலும் விஐபிக்களின் வருகையால் பெரும் பரபரப்பு நிலவியது.
ஒரே நேரத்தில் இவ்வளவு அதிகமான தனியார் ஜெட் விமானங்கள் மற்றும் சர்வதேசப் பிரதிநிதிகள் வருகை தந்தது, இலங்கையின் விமான நிலைய சேவைகள் மற்றும் விருந்தோம்பல் துறைக்குக் கணிசமான வருமானத்தை ஈட்டித் தந்துள்ளதாகத் தெரிவிக்கப்படுகிறது. சர்வதேச விளையாட்டுப் போட்டிகள் இலங்கையில் நடைபெறுவது நாட்டின் நற்பெயரை உலகளவில் உயர்த்தியுள்ளதாகப் பொருளாதார ஆய்வாளர்கள் கருதுகின்றனர்.
