வாத்துவ மற்றும் பின்வத்தை ரயில் நிலையங்களுக்கு இடைப்பட்ட பகுதியில் அமைந்துள்ள ரயில் பாலத்தின் மீது இன்று (மார்ச் 9) மாலை இடம்பெற்ற துயர விபத்தில், இங்கிலாந்தைச் சேர்ந்த சுமார் 70 வயதுடைய சுற்றுலாப் பயணி ஒருவர் உயிரிழந்துள்ளார். இந்த விபத்தில் காயமடைந்த மற்றொரு வெளிநாட்டுப் பெண்மணி உட்பட மூவர் பாணந்துறை ஆதார வைத்தியசாலையில் சிகிச்சைக்காக அனுமதிக்கப்பட்டுள்ளதாகப் பொலிஸார் தெரிவித்தனர்.
சம்பவம் குறித்த விசாரணைகளின்படி, இங்கிலாந்தைச் சேர்ந்த இரு சுற்றுலாப் பயணிகளுடன் இரண்டு உள்ளூர் நபர்களும் ஒரு சிறுவனும் கடற்கரைக்குச் சென்றுவிட்டுத் திரும்பியுள்ளனர். அப்பொழுது அவர்கள், பயன்பாட்டில் இல்லாத பாலம் எனத் தவறாக நினைத்து, இந்த ரயில் பாலத்தின் மீது ஏறி இயற்கை காட்சிகளை இரசித்துக் கொண்டிருந்தனர். அந்த நேரத்தில் பெலியத்தையிலிருந்து கண்டி நோக்கிச் சென்ற அதிவேக ரயில் வருவதைக்கண்டு, பதற்றமடைந்த அவர்கள் தண்டவாளத்திலிருந்து விலகிச் செல்ல முற்பட்டபோதே இந்த அனர்த்தம் நேர்ந்துள்ளது.
ரயில் மோதியதில் குறித்த பிரித்தானியப் பிரஜை பாலத்திலிருந்து கீழே இருந்த பின்வத்தை கால்வாய்க்குள் தூக்கி வீசப்பட்டு, சம்பவ இடத்திலேயே உயிரிழந்துள்ளார். அவருடன் இருந்த ஏனைய நால்வரும் தப்பியோட முயன்று கால்வாய்க்குள் குதித்துள்ளனர். இதில் காயமடைந்த வெளிநாட்டுப் பெண்மணி, சிறுவன் மற்றும் மற்றுமொரு உள்ளூர் நபர் தற்போது வைத்தியசாலையில் தீவிர கண்காணிப்பில் உள்ளனர்.
பின்வத்தை பொலிஸார் மேலதிக விசாரணைகளை முன்னெடுத்து வருகின்றனர். பொதுவாகப் பயன்பாட்டில் உள்ள ரயில் தண்டவாளங்கள் மற்றும் பாலங்களில் பொதுமக்கள் நடமாடுவது உயிருக்கு ஆபத்தானது என்பதை இந்தச் சம்பவம் மீண்டும் ஒருமுறை உணர்த்தியுள்ளது. ரயில் கடவைகளுக்கு அப்பால் உள்ள தண்டவாளப் பாதைகளில் செல்வதை தவிர்க்குமாறு ரயில்வே திணைக்களம் தொடர்ச்சியாக எச்சரித்து வந்த போதிலும், இத்தகைய விபத்துக்கள் நிகழ்வது துரதிர்ஷ்டவசமானது.