சீருடையில் மறைந்திருக்கும் அவலம்: வருமானம் தேடி சட்டவிரோத தொழில்களில் சிறுவர்கள் – தொழில் அமைச்சு கண்டனம்!

இலங்கையில் 18 வயதுக்குட்பட்ட சிறுவர்கள் பல்வேறு சட்டவிரோத தொழில்களில் ஈடுபடுவதோடு, அதனை மறைப்பதற்காகப் பாடசாலை சீருடையைப் பயன்படுத்துவது கண்டறியப்பட்டுள்ளதாகத் தொழில் அமைச்சு எச்சரிக்கை விடுத்துள்ளது.

பாடசாலை சென்று வீடு திரும்புவது போன்ற தோற்றத்தை வெளி உலகிற்குத் காட்டுவதற்காக, சிறுவர்கள் சீருடை அணிந்த நிலையிலேயே வருமானம் ஈட்டும் வேலைகளில் ஈடுபடுகின்றனர்.

கடுமையான பொருளாதாரச் சுமையை எதிர்கொள்ளும் குடும்பங்களைச் சேர்ந்த சிறுவர்களே, இவ்வாறு வருமானம் தேடி கல்விக்குப் பதிலாக வேலைக்குச் செல்ல வேண்டிய கட்டாயத்திற்குத் தள்ளப்படுவதாகத் தொழில் அமைச்சின் செயலாளர் எஸ். எம். பியதிஸ்ஸ தெரிவித்துள்ளார்.

மறைமுகச் செயல்பாடுகள்: குறிப்பாகச் சில சட்டவிரோத நடவடிக்கைகளிலும் சிறுவர்கள் இத்தகைய சீருடைப் போர்வையில் ஈடுபடுத்தப்படுவது கவலையளிப்பதாக அவர் சுட்டிக்காட்டியுள்ளார்.

இந்த விவகாரத்தைச் சமூக மற்றும் சட்டப் பிரச்சினையாகக் கருதி, மகளிர் மற்றும் சிறுவர் விவகார அமைச்சுடன் இணைந்து கடுமையான சட்ட நடவடிக்கைகளை மேற்கொள்ளத் தொழில் அமைச்சு தீர்மானித்துள்ளது. சிறுவர் உழைப்பைத் தடுத்தல் மற்றும் வறுமையிலுள்ள குடும்பங்களுக்கு மாற்று வழிகளை வழங்குவது குறித்தும் ஆலோசிக்கப்பட்டு வருகிறது.