இன்று (மார்ச் 8) உலகம் முழுவதும் சர்வதேச மகளிர் தினம் மிகச் சிறப்பாகக் கொண்டாடப்படுகிறது. சமூக, பொருளாதார, கலாசார மற்றும் அரசியல் துறைகளில் பெண்கள் ஆற்றிவரும் அளப்பரிய பங்களிப்பினை அங்கீகரிப்பதற்கும், பாலின சமத்துவத்தை வலியுறுத்துவதற்கும் இந்நாள் ஒரு முக்கிய மைல்கல்லாக அமைகிறது. 1977 ஆம் ஆண்டில் ஐக்கிய நாடுகள் சபை மார்ச் 8 ஆம் திகதியை அதிகாரப்பூர்வமாக சர்வதேச மகளிர் தினமாக அறிவித்ததிலிருந்து, ஒவ்வொரு ஆண்டும் இந்நாள் உலகெங்கிலும் உள்ள பெண்களின் போராட்டங்களையும் சாதனைகளையும் நினைவுகூரும் தினமாகத் திகழ்கிறது.
இலங்கையில் இம்முறை “வளமான நாட்டின் பெருமை அவள் – தேசத்தின் வழிகாட்டி” எனும் தொனிப்பொருளின் கீழ் சர்வதேச மகளிர் தினம் கொண்டாடப்படுகிறது. பெண்களைக் குடும்பத்தின் தூணாகவும், சமூகத்தின் அடித்தளமாகவும் மட்டுமன்றி, நாட்டின் அபிவிருத்திச் செயல்பாடுகளில் முக்கிய பங்காளிகளாகவும் முன்னிறுத்தும் வகையில் இந்த ஆண்டுக்கான தேசியக் கொண்டாட்டங்கள் அமைக்கப்பட்டிருக்கின்றன. தேசிய, மாகாண, மாவட்ட மற்றும் பிரதேச மட்டங்களில் பல்வேறு விழிப்புணர்வு நிகழ்ச்சிகள் மற்றும் கௌரவிப்பு நிகழ்வுகள் ஏற்பாடு செய்யப்பட்டுள்ளன.
பெண்களின் உரிமைகளை உறுதிப்படுத்துதல், அவர்களுக்கு எதிரான வன்முறைகளைத் தடுத்தல் மற்றும் அனைத்துத் துறைகளிலும் பெண்களின் தலைமைத்துவத்தை ஊக்குவித்தல் ஆகிய நோக்கங்களை மையமாகக் கொண்டே இன்றைய கொண்டாட்டங்கள் முன்னெடுக்கப்படுகின்றன. குறிப்பாக, பொருளாதார ரீதியில் பெண்களை வலுப்படுத்துதல், பெண் தொழில்முனைவோருக்குத் தேவையான சந்தை வாய்ப்புகளை உருவாக்குதல் மற்றும் கல்வி, தொழில்நுட்பம், அரசியல் போன்ற துறைகளில் பெண்களின் பிரதிநிதித்துவத்தை அதிகரிப்பதன் அவசியம் குறித்து இன்றைய தினத்தில் விசேடமாக வலியுறுத்தப்படுகிறது.
“பெண் என்பவள் எந்தவொரு சமூகத்தின் கட்டமைப்பிற்கும் வலுவான பிணைப்பாக விளங்குகிறாள். பண மதிப்பீடுகளுக்கு அப்பாற்பட்ட அவளது அர்ப்பணிப்பு, நாட்டின் தேசிய உற்பத்தியில் தவிர்க்க முடியாத சக்தியாகும்” என்பதை உணர்த்தும் வகையில், அனைத்து மட்டங்களிலும் பெண்கள் கௌரவிக்கப்படுகின்றனர். பாலின பாகுபாடற்ற, பாதுகாப்பான மற்றும் கண்ணியமான சமூகத்தைக் கட்டியெழுப்புவதில் அரசாங்கமும், சர்வதேச அமைப்புகளும் இணைந்து முன்னெடுக்கும் முயற்சிகளுக்கு இத்தினம் வலுசேர்க்கிறது.