இயக்குநர் ரியான் கூக்ளர் (Ryan Coogler) இயக்கத்தில் உருவான ‘சின்னர்ஸ்’ (Sinners) எனும் திகில் திரைப்படம், 2026 ஆம் ஆண்டிற்கான ஒஸ்கார் (Academy Awards) விருதுப் பட்டியலில் 16 பிரிவுகளில் பரிந்துரைக்கப்பட்டு உலக சாதனை படைத்துள்ளது.
ஒஸ்கார் விருது வரலாற்றில் இதுவரை மூன்று திரைப்படங்கள் மட்டுமே அதிகபட்சமாக தலா 14 பரிந்துரைகளை பெற்று முதலிடத்தில் இருந்தன. அந்தப் பட்டியலை ‘சின்னர்ஸ்’ தற்போது பின்னுக்குத் தள்ளியுள்ளது:
டைட்டானிக் (Titanic – 1997)
ஆல் அபௌட் ஈவ் (All About Eve – 1950)
லா லா லேண்ட் (La La Land – 2016)
தற்போது 16 பரிந்துரைகளுடன் ‘சின்னர்ஸ்’ திரைப்படம், ஒஸ்கார் வரலாற்றிலேயே ஒரே ஆண்டில் அதிகப்படியான பரிந்துரைகளைப் பெற்ற முதல் திரைப்படம் என்ற மகுடத்தைச் சூடிக்கொண்டது.
‘பிளாக் பான்தர்’ புகழ் இயக்குநர் ரியான் கூக்ளர் மற்றும் நடிகர் மைக்கேல் பி. ஜோர்டான் (Michael B. Jordan) மீண்டும் இணைந்துள்ள இந்தப் படம், ஆரம்பத்திலிருந்தே பெரும் எதிர்பார்ப்பை ஏற்படுத்தியிருந்தது. 1930-களின் பின்னணியில் ஜிம் குரோ (Jim Crow) காலத்து அமெரிக்காவின் தெற்குப் பகுதியில் நடக்கும் ஒரு இயற்கைக்கு அப்பாற்பட்ட (Supernatural Horror) திகில் கதையாக இது உருவாக்கப்பட்டுள்ளது.
வழக்கமாகத் திகில் திரைப்படங்களுக்கு ஒஸ்கார் விருதுகளில் குறைந்த அளவிலான அங்கீகாரமே கிடைக்கும் என்ற பிம்பத்தை உடைத்து, தொழில்நுட்ப ரீதியாகவும் கலை ரீதியாகவும் இத்திரைப்படம் இமாலய சாதனையை நோக்கிப் பயணித்து வருகின்றது.