இயக்குநர் ஷங்கர் தனது அடுத்தப் பிரம்மாண்டத் திரைப்படமான **’வேள்பாரி’**யை உலகத் தரத்தில், ஹாலிவுட் படங்களுக்கு இணையாக உருவாக்கத் திட்டமிட்டு வருவதாகவும், இப்படத்தின் மொத்த பட்ஜெட் 1000 கோடி ரூபாயை எட்டக்கூடும் எனவும் தகவல்கள் வெளியாகியுள்ளன. இது உண்மை என்றால், ஷங்கர் இயக்கத்தில் உருவாகும் படங்களிலேயே இதுவே மிகப்பெரிய பட்ஜெட்டாகும்.
சமீபத்தில் வெளியாகி தோல்வியைத் தழுவிய ‘இந்தியன் 2’ மற்றும் ‘கேம் சேஞ்சர்’ ஆகிய படங்களைத் தொடர்ந்து, ஷங்கர் தனது அடுத்தப் படைப்பு குறித்து தீவிரமாக உள்ளார்.
” ‘எந்திரன்’தான் எனது கனவுத் திட்டம் என்று நினைத்தேன், ஆனால், இப்போது அப்படி இல்லை. ‘வேள்பாரி’தான் தற்போது என்னை மிகவும் ஊக்கப்படுத்தும் படம். அது ‘கேம் ஆஃப் த்ரோன்ஸ்’ அல்லது ‘அவதார்’ போன்ற உலகத் தரத்திலான படமாக இருக்கும்.”
ரசிகர்கள் எதிர்பார்த்து காத்திருந்த ‘இந்தியன் 3’ படத்திற்குப் பதிலாக, தற்போது ஷங்கர் ‘வேள்பாரி’யை கையில் எடுத்துள்ளார். ‘இந்தியன் 3’ படத்தின் பணிகளை முடித்துவிட்டு, அடுத்த ஆண்டு ஜூன் மாதம் முதல் ‘வேள்பாரி’ படப்பிடிப்பைத் தொடங்குவார் என எதிர்பார்க்கப்படுகிறது.
இப்படத்தின் கதாநாயகனாக நடிக்க நடிகர்கள் சூர்யா அல்லது விக்ரமுக்கு அதிக வாய்ப்புகள் உள்ளதாகக் கூறப்படுகிறது. இருப்பினும், இது குறித்து எந்த அதிகாரப்பூர்வ அறிவிப்பும் இதுவரை வெளியாகவில்லை.
