பாதுகாப்பான புத்தாண்டு கொண்டாட்டம்: விபத்துக்கள் குறித்து அதிகாரிகளின் எச்சரிக்கை!

எதிர்வரும் சிங்கள மற்றும் தமிழ் புத்தாண்டு காலப்பகுதியில் சாலைப் போக்குவரத்து விபத்துக்கள் மற்றும் பட்டாசு தொடர்பான அசம்பாவிதங்கள் அதிகரிக்கும் அபாயம் உள்ளதால், பொதுமக்கள் மிகுந்த விழிப்புணர்வுடன் இருக்குமாறு சுகாதார மற்றும் பாதுகாப்பு அதிகாரிகள் வலியுறுத்தியுள்ளனர். சுகாதார மேம்பாட்டுப் பணியகத்தில் இன்று நடைபெற்ற ஊடக சந்திப்பின் போது, பண்டிகைக் காலங்களில் ஏற்படும் உயிரிழப்புகளைத் தவிர்க்க பொதுமக்கள் பின்பற்ற வேண்டிய அத்தியாவசிய வழிகாட்டல்கள் குறித்து விரிவாக விளக்கப்பட்டது.

காவல்துறை பிரதி இன்ஸ்பெக்டர் நாயகம் டபிள்யூ.பி.ஜே. சேனதீர உரையாற்றுகையில், மது அருந்திவிட்டு வாகனம் ஓட்டுதல் மற்றும் அதிவேகப் பயணம் காரணமாகவே ஒவ்வொரு ஆண்டும் அதிக உயிரிழப்புகள் பதிவாவதாகத் தெரிவித்தார். “எந்தச் சூழ்நிலையிலும் மது போதையில் வாகனம் ஓட்ட வேண்டாம். இருசக்கர வாகன ஓட்டிகள் கட்டாயம் தலைக்கவசத்தை முறையாக அணிய வேண்டும்” என்று அவர் கேட்டுக்கொண்டார். புத்தாண்டு காலப்பகுதியில் போக்குவரத்து விதிகளை மீறுபவர்களுக்கு எதிராகத் தராதரம் பாராது கடுமையான சட்ட நடவடிக்கை எடுக்கப்படும் என்றும் அவர் எச்சரித்தார்.

பட்டாசு விபத்துக்களால் ஏற்படும் தீக்காயங்கள் குறித்து எச்சரித்த விசேட வைத்திய நிபுணர் செனிதா லியனகே, தீக்காயங்களுக்குச் சாம்பல், பற்பசை அல்லது எண்ணெயைப் பூசுவதைத் தவிர்க்குமாறு அறிவுறுத்தினார். அதற்குப் பதிலாக, காயமடைந்த பகுதியை 15 – 20 நிமிடங்கள் சுத்தமான ஓடும் நீரின் கீழ் வைத்திருந்து, பின்னர் சுத்தமான துணியால் மூடி உடனடியாக மருத்துவமனைக்குக் கொண்டு செல்ல வேண்டும் என்றார். அதேசமயம், நீரிழிவு மற்றும் உயர் இரத்த அழுத்தம் உள்ளவர்கள் இனிப்பு மற்றும் எண்ணெய் உணவுகளைக் கட்டுப்படுத்தி, மருந்துகளைத் தடையின்றி உட்கொள்ள வேண்டும் என வைத்திய நிபுணர் சிறிணி அலகப்பெரும வலியுறுத்தினார்.

வீட்டு விபத்துக்கள் மற்றும் சிறுவர்கள் சூடான திரவங்களால் பாதிக்கப்பட வாய்ப்புள்ளதால், பெற்றோர்கள் கண்காணிப்பைத் தீவிரப்படுத்த வேண்டும் என டாக்டர் ஷிலாந்தி செனவிரத்ன சுட்டிக்காட்டினார். மேலும், தற்போது நிலவும் அதிக வெப்பநிலை காரணமாக வெப்பத்தாக்கம் (Heat Stroke) ஏற்படக்கூடும் என்பதால், உடலை நீரேற்றத்துடன் (Hydrated) வைத்திருக்க வேண்டும் என டாக்டர் சமிதா சிறிதுங்க அறிவுறுத்தினார். இந்த பாதுகாப்பு வழிகாட்டல்களைப் பின்பற்றுவதன் மூலம் தேவையற்ற மருத்துவமனைச் சேர்க்கைகளைத் தவிர்த்து, மகிழ்ச்சியான புத்தாண்டைக் கொண்டாட முடியும் என சுகாதார மேம்பாட்டுப் பணியகத்தின் இயக்குநர் ரஞ்சித் பதுவந்ததுவே தெரிவித்தார்.