இலங்கையில் தற்போது நடைமுறையிலுள்ள எரிபொருள் விலை மானியத்தை முன்னெடுத்துச் செல்வதற்குச் சர்வதேச நாணய நிதியம் (IMF) இதுவரை எவ்வித எதிர்ப்பையும் தெரிவிக்கவில்லை என எரிசக்தி அமைச்சு தெரிவித்துள்ளது. இதன்படி, டீசல் மற்றும் பெட்ரோல் மீதான தற்போதைய மானிய விலையிலேயே விநியோகம் தொடரவுள்ளதால், நுகர்வோர் உடனடி விலையேற்றம் குறித்து அச்சமடையத் தேவையில்லை என உறுதி அளிக்கப்பட்டுள்ளது. சர்வதேச சந்தையில் கச்சா எண்ணெய் விலை அதிகரித்த போதிலும், உள்நாட்டில் விலையைச் சீராகப் பேணுவதற்கு இந்த இணக்கப்பாடு உதவியாக அமைந்துள்ளது.
தற்போது நடைமுறையிலுள்ள மானிய முறைமையின் கீழ், ஒரு லீட்டர் டீசலுக்கு 100 ரூபாயையும், ஒரு லீட்டர் பெட்ரோலுக்கு 20 ரூபாயையும் அரசாங்கம் சுயமாக ஏற்றுக்கொண்டுள்ளது. இந்த ஏற்பாடு குறித்து விளக்கமளித்த எரிசக்தி அமைச்சின் செயலாளர் பேராசிரியர் உதயங்க ஹேமபால, சர்வதேச நாணய நிதியத்தின் பிரதிநிதிகள் தற்போது இலங்கையில் தங்கியிருந்து பொருளாதார மீளாய்வுகளைச் செய்து வரும் நிலையில், இந்த மானியத் திட்டத்திற்கு அவர்கள் இதுவரை ஆட்சேபனை தெரிவிக்கவில்லை எனக் குறிப்பிட்டார். “தற்போதைய இக்கட்டான சூழலில் இந்த ஏற்பாட்டைத் தொடர முடியும்” என அவர் நம்பிக்கை வெளியிட்டுள்ளார்.
இது குறித்து அண்மையில் கருத்து தெரிவித்த அமைச்சரவைப் பேச்சாளர் கலாநிதி நளிந்த ஜயதிஸ்ஸ, எரிபொருள் விலையேற்றத்திலிருந்து பொதுமக்களைப் பாதுகாப்பதற்காக அரசாங்கம் மாதந்தோறும் சுமார் 20 பில்லியன் ரூபாயைச் செலவிட்டு வருவதாகத் தெரிவித்தார். ஒருவேளை எரிபொருள் இறக்குமதிக்கான முழுச் செலவையும் மானியமின்றி அரசாங்கம் ஏற்க நேரிட்டால், அது ஆண்டுக்குச் சுமார் 1.5 பில்லியன் அமெரிக்க டொலர் மேலதிக செலவை ஏற்படுத்தும் எனவும், இது நாட்டின் அந்நியச் செலாவணி கையிருப்பில் பெரும் அழுத்தத்தை உருவாக்கும் எனவும் அவர் எச்சரித்துள்ளார்.
எதிர்வரும் மே மாதம் முதலாம் திகதி வரை இந்த மானிய முறையைத் தடையின்றித் தொடர அரசாங்கம் திட்டமிட்டுள்ளது. மே மாதத்திற்குப் பிறகும் இதனை நீடிப்பதா என்பது குறித்து, மத்திய கிழக்கில் நிலவும் போர்ச் சூழல் மற்றும் சர்வதேச நாணய நிதியத்தின் இறுதி மீளாய்வு அறிக்கை ஆகியவற்றைப் பொறுத்தே தீர்மானிக்கப்படும் எனச் சுட்டிக்காட்டப்பட்டுள்ளது. ஒருவேளை சர்வதேச நாணய நிதியத்தின் அனுமதி மறுக்கப்பட்டால், தற்போது அரசாங்கம் ஏற்றுக்கொண்டுள்ள மானியத் தொகை நேரடியாக எரிபொருள் விலையுடன் சேர்க்கப்பட்டு, சந்தையில் விலை அதிகரிக்கப்பட வேண்டிய நிலை ஏற்படும் எனவும் அதிகாரிகள் தெரிவித்துள்ளனர்.
