இலங்கையிலுள்ள அனைத்துக் காணிகளையும் நவீன தொழில்நுட்பத்தின் உதவியுடன் முறையாக வரைபடமாக்கி (Mapping), டிஜிட்டல் மயப்படுத்தும் விசேட வேலைத்திட்டம் தொடர்பிலான மீளாய்வுக் கூட்டம் கடந்த (04.03.2026) அன்று நில அளவைத் திணைக்களத்தில் நடைபெற்றது. விவசாய, கால்நடை, காணி மற்றும் நீர்ப்பாசன அமைச்சர் கே.டி. லால் காந்தா அவர்களின் தலைமையில் நடைபெற்ற இந்தக் கலந்துரையாடலில், நாட்டின் காணி நிர்வாகத்தை ஒருமுகப்படுத்துவதற்கான முக்கிய தீர்மானங்கள் எடுக்கப்பட்டன.
இந்தத் திட்டத்தின் ஊடாக, நாட்டில் உள்ள ஒவ்வொரு அங்குல காணி தொடர்பான முழுமையான விபரங்களையும் ஒரே டிஜிட்டல் தளத்தில் (Single Platform) பெற்றுக்கொள்ள வழிவகை செய்யப்படும். இதன் மூலம் ஆண்டாண்டு காலமாகத் தீர்க்கப்படாமல் உள்ள காணிப் பிணக்குகளுக்கு (Land Disputes) அறிவியல் ரீதியான தீர்வுகளை வழங்க முடியும் என்பதுடன், காணி அதிகாரிகள் மற்றும் பொதுமக்களுக்கான உத்தியோகபூர்வ கொடுக்கல் வாங்கல்களை மிகவும் எளிதாக்க முடியும் என அமைச்சர் இதன்போது சுட்டிக்காட்டினார்.
காணிகளை வரைபடமாக்கும் இந்த முன்னோடித் திட்டம் (Pilot Project) மொனராகலை மாவட்டத்தில் ஆரம்பிக்கப்பட்டு, தற்போது அங்கு 90 சதவீதத்திற்கும் அதிகமான பணிகள் வெற்றிகரமாக நிறைவடைந்துள்ளன. மொனராகலையில் கிடைத்த அனுபவங்களைக் கொண்டு, அடுத்து வரும் மாதங்களில் ஏனைய மாவட்டங்களுக்கும் இந்தத் திட்டத்தை விரிவுபடுத்தத் திட்டமிடப்பட்டுள்ளது. குறிப்பாக, காணி உரிமை தொடர்பான தகவல்கள் தெளிவாக இருக்கும்போது, பிணக்குகளின்றித் துரிதமான அபிவிருத்திப் பணிகளை முன்னெடுக்க முடியும் என எதிர்பார்க்கப்படுகிறது.
இந்த நிகழ்வில் உரையாற்றிய விவசாய அமைச்சின் செயலாளர், முறையான காணி வரைபடங்கள் இல்லாத காரணத்தினால் இலங்கை பல பாரிய வெளிநாட்டு முதலீடுகளை (Foreign Investments) இழந்துள்ளதாகக் குறிப்பிட்டார். முதலீட்டாளர்கள் காணிகளைப் பெற்றுக்கொள்ள ஆர்வம் காட்டினாலும், அந்தத் தரவுகள் டிஜிட்டல் மயப்படுத்தப்படாததால் தாமதங்கள் ஏற்படுகின்றன. இந்தப் புதிய வரைபடமாக்கல் திட்டம் பூர்த்தியடையும் பட்சத்தில், முதலீட்டாளர்களுக்குத் தேவையான தகவல்களைத் துரிதமாக வழங்க முடியும், இது நாட்டின் பொருளாதார வளர்ச்சிக்கு வித்திடும் என அவர் மேலும் தெரிவித்தார்.
