ஈரான் மீதான அமெரிக்க – இஸ்ரேலிய தாக்குதல்: ஐக்கிய நாடுகள் சபையின் விசாரணைக் குழு கடும் கண்டனம்!

ஈரானில் இடம்பெறும் மனித உரிமை மீறல்கள் குறித்து விசாரணை செய்து வரும் ஐக்கிய நாடுகள் சபையின் உண்மை கண்டறியும் குழு, இன்று (புதன்கிழமை) விசேட அறிக்கை ஒன்றை வெளியிட்டுள்ளது. அமெரிக்கா மற்றும் இஸ்ரேலினால் ஈரானின் இறையாண்மைக்கு எதிராக முன்னெடுக்கப்படும் இந்த ராணுவத் தாக்குதல்கள், ஐக்கிய நாடுகள் சபையின் சாசனத்தை (UN Charter) நேரடியாக மீறும் செயல் என அக்குழு சுட்டிக்காட்டியுள்ளது. எந்தவொரு நாட்டின் பிராந்திய ஒருமைப்பாடு அல்லது அரசியல் சுதந்திரத்திற்கு எதிராகப் பலத்தைப் பயன்படுத்துவதை ஐக்கிய நாடுகள் சாசனம் தடைசெய்கிறது என்பதை அக்குழு மீண்டும் நினைவுபடுத்தியுள்ளது.

தெற்கு ஈரானின் மினாப் (Minab) பகுதியில் அமைந்துள்ள ஷஜரே தய்யேபா (Shajareh Tayyebeh) எனும் சிறுமிகளுக்கான ஆரம்பப் பாடசாலை மீது கடந்த சனிக்கிழமை நடத்தப்பட்ட தாக்குதல் குறித்துத் தாங்கள் மிகுந்த அதிர்ச்சியடைந்துள்ளதாக அக்குழு தெரிவித்துள்ளது. இந்தத் தாக்குதலில் 7 முதல் 12 வயதுக்குட்பட்ட 40-க்கும் மேற்பட்ட பள்ளிச் சிறுமிகள் கொல்லப்பட்டுள்ளதாகத் தகவல்கள் வெளியாகியுள்ளன. போரின் பெயரால் அப்பாவிச் சிறுமிகள் பலியாவதை ஒருபோதும் ஏற்றுக்கொள்ள முடியாது என அக்குழுவின் அறிக்கையில் வலியுறுத்தப்பட்டுள்ளது.

தற்போது ஈரானிய மக்கள் ஒருபுறம் பல வாரங்களாகத் தொடரக்கூடிய பாரிய வெளிநாட்டு ராணுவத் தாக்குதல்களுக்கும், மறுபுறம் உள்நாட்டு அரசாங்கத்தின் அடக்குமுறைகளுக்கும் இடையில் சிக்கியுள்ளதாக ஐக்கிய நாடுகள் சபையின் நிபுணர்கள் கவலை வெளியிட்டுள்ளனர். ஏற்கனவே ஈரானில் நடைபெற்று வரும் உள்நாட்டுப் போராட்டங்களைக் கட்டுப்படுத்த அரசாங்கம் மேற்கொண்டு வரும் தீவிர நடவடிக்கைகளால் ஆயிரக்கணக்கானோர் கைது செய்யப்பட்டுள்ள நிலையில், இந்த வெளிநாட்டுத் தாக்குதல்கள் பொதுமக்களின் பாதுகாப்பை மேலும் கேள்விக்குறியாக்கியுள்ளன.

ஆயுத மோதல்கள் மற்றும் அரசியல் மாற்றங்களுக்காக ராணுவ பலத்தைப் பயன்படுத்துவது சர்வதேசச் சட்டங்களுக்கு எதிரானது என அக்குழுவின் தலைவி சாரா ஹொசைன் தெரிவித்துள்ளார். ஈரானின் உச்சத் தலைவர் உள்ளிட்ட உயர் அதிகாரிகளை இலக்கு வைத்து நடத்தப்படும் தாக்குதல்கள், சர்வதேசச் சட்டத்தின் கீழ் நீதியை நிலைநாட்டும் முறையாகக் கருதப்பட முடியாது எனவும் அக்குழு தெளிவுபடுத்தியுள்ளது. அனைத்துத் தரப்பினரும் உடனடியாகத் தாக்குதல்களை நிறுத்திவிட்டு, பேச்சுவார்த்தை மூலம் அமைதியை நிலைநாட்ட முன்வர வேண்டும் என ஐக்கிய நாடுகள் சபை கோரிக்கை விடுத்துள்ளது.