இனவாதம் உட்பட அனைத்து வகையான சமூகப் பாகுபாடுகளையும் ஒழிப்பதில் தற்போதைய அரசாங்கம் உறுதியாக இருப்பதாகப் பிரதமர் ஹரிணி அமரசூரிய தெரிவித்தார். மன்னார், அடம்பன் பகுதியில் இன்று (15) நடைபெற்ற மன்னார் மாவட்டப் பெண்கள் மாநாட்டில் கலந்துகொண்டு உரையாற்றும் போதே அவர் இதனைத் தெரிவித்தார். இவ்வாறான சமூக அநீதிகளால் பெண்களே அதிகளவில் பாதிக்கப்படுகின்றனர் என்ற உண்மையை அரசாங்கம் ஏற்றுக்கொள்வதாகவும் அவர் இதன்போது பகிரங்கமாகத் தெரிவித்தார்.
நாட்டில் தற்போது ஆரம்பிக்கப்பட்டுள்ள அரசியல் மற்றும் சமூக மாற்றத்தை வெற்றிகரமாக முன்னோக்கி எடுத்துச் செல்ல, அனைவரையும் உள்ளடக்கிய பலமான பெண் தலைமைத்துவம் அவசியம் எனப் பிரதமர் சுட்டிக்காட்டினார். இந்த மாற்றத்தை வடிவமைப்பதிலும், எதிர்காலச் சவால்களை எதிர்கொள்வதிலும் பெண்கள் முன்வந்து தீவிரமான பங்களிப்பை வழங்க வேண்டும் என அவர் அழைப்பு விடுத்தார். பெண்களின் தலைமைத்துவப் பண்பு சமூகத்தின் அடிமட்டம் வரை சென்றடைய வேண்டும் என்பதே அரசாங்கத்தின் இலக்காகும்.
வன்முறைகள் மற்றும் துஷ்பிரயோகங்களுக்கு உள்ளாகும் பெண்கள் மற்றும் சிறுவர்களின் பாதுகாப்பை உறுதிப்படுத்துவதற்காகச் சட்டங்கள் மேலும் பலப்படுத்தப்படும் எனப் பிரதமர் உறுதியளித்தார். வெறும் சட்டங்களை உருவாக்குவதுடன் நின்றுவிடாமல், அவை வினைத்திறனுடன் நடைமுறைப்படுத்தப்படுவதையும் அரசாங்கம் கண்காணிக்கும் என வலியுறுத்தப்பட்டது. இதன் மூலம் பாதிக்கப்பட்டவர்களுக்கு விரைவான நீதி கிடைப்பதையும், பாதுகாப்பான சூழல் உருவாவதையும் உறுதி செய்ய முடியும் என அவர் தனது உரையில் சுட்டிக்காட்டினார்.
