ஆப்பிள் விடுத்துள்ள அவசர எச்சரிக்கை: கூகுள் குரோமுக்கு பதில் சபாரி பிரவுசரைப் பயன்படுத்துமாறு வலியுறுத்தல்!

ஆப்பிள் (Apple) நிறுவனம் உலகம் முழுவதும் உள்ள தனது கோடிக்கணக்கான வாடிக்கையாளர்களுக்கு மிக முக்கியமான பாதுகாப்பு எச்சரிக்கை ஒன்றைப் பிறப்பித்துள்ளது. கூகுள் குரோம் (Google Chrome) பிரவுசரைப் பயன்படுத்துவதை விட, ஆப்பிளின் ‘சபாரி’ (Safari) பிரவுசரைப் பயன்படுத்துவதே பாதுகாப்பானது என அந்நிறுவனம் தெரிவித்துள்ளது.

பழைய குரோம் பதிப்புகளைப் பயன்படுத்துவதால் பயனர்களின் தனிப்பட்ட தரவுகள் மற்றும் தனியுரிமைக்கு (Privacy) பாதிப்பு ஏற்பட வாய்ப்புள்ளதாக ஆப்பிள் சுட்டிக்காட்டியுள்ளது.

பாதுகாப்பு அப்டேட்கள் (Security Updates) முறையாகக் கிடைக்காத பிரவுசர்கள் வழியாக சைபர் குற்றவாளிகள் ஊடுருவித் தகவல்களைத் திருடக்கூடும் எனத் தொழில்நுட்ப நிபுணர்கள் எச்சரிக்கின்றனர்.

ஆப்பிளின் இந்த எச்சரிக்கைக்குப் பலமாக, கூகுள் நிறுவனமும் கூட ஒரு எச்சரிக்கையை விடுத்துள்ளது. ஆப்பிள் சாதனங்களைப் பயன்படுத்துபவர்கள், பழைய பதிப்பிலான குரோமைப் பயன்படுத்த வேண்டாம் என்றும், அது சைபர் தாக்குதல்களுக்கு வழிவகுக்கும் என்றும் கூகுள் ஒப்புக் கொண்டுள்ளது.

பயனர்களின் இணையத் தேடல்களை (Web Browsing) மூன்றாம் தரப்பு நிறுவனங்கள் கண்காணிக்காத வகையில் சபாரி வடிவமைக்கப்பட்டுள்ளதாகவும், அதன் மேம்படுத்தப்பட்ட பாதுகாப்பு அம்சங்கள் சைபர் தாக்குதல்களை முறியடிக்க வல்லது என்றும் ஆப்பிள் தனது விளம்பரங்களில் வலியுறுத்தத் தொடங்கியுள்ளது.

வாடிக்கையாளர்கள் தங்கள் பிரவுசர்களை உடனுக்குடன் அப்டேட் செய்ய வேண்டும் அல்லது அதிக பாதுகாப்பு கொண்ட உலாவிகளுக்கு மாற வேண்டும் என்பதே இந்த எச்சரிக்கையின் பிரதான நோக்கமாகும்.