பாகிஸ்தானில் நிலவி வரும் கடும் பொருளாதார நெருக்கடிக்கு மத்தியில், அந்நாட்டு மக்களின் தேநீர் மற்றும் சீனி நுகர்வு பழக்கம் அந்நாட்டின் பொருளாதாரத்தை மேலும் பாதாளத்திற்குத் தள்ளி வருவதாகப் புதிய ஆய்வுகள் எச்சரிக்கின்றன.
உலகின் மிகப்பெரிய இறக்குமதியாளர்: பாகிஸ்தான் உலகின் மிகப்பெரிய தேயிலை இறக்குமதி நாடுகளில் ஒன்றாகத் திகழ்கிறது. அந்நியச் செலாவணி கையிருப்பு மிகக் குறைவாக உள்ள நிலையிலும், வருடாந்தம் சுமார் 600 மில்லியன் டொலர்களுக்கும் அதிகமான தொகையை தேயிலை இறக்குமதிக்காக மட்டுமே செலவிடுகிறது.
பாகிஸ்தான் கலாசாரத்தில் ‘சாய்’ (Chai) என்பது ஒரு தவிர்க்க முடியாத அங்கமாகும். ஒரு சராசரி நபர் ஒரு நாளைக்கு 3 முதல் 4 கோப்பை தேநீர் அருந்துகிறார். தேநீரில் அதிகளவு சீனியைச் சேர்த்துக்கொள்ளும் வழக்கம் காரணமாக, உள்நாட்டில் சீனிக்கான தேவையும் அதிகரித்து, அதுவும் ஒரு பொருளாதாரச் சுமையாக மாறியுள்ளது.
பாகிஸ்தான் திட்டமிடல் அமைச்சர் அஹ்சன் இக்பால் ஏற்கனவே விடுத்திருந்த கோரிக்கையில், “நாம் கடனாகப் பெற்ற பணத்தில்தான் தேயிலையை இறக்குமதி செய்கிறோம். எனவே மக்கள் தேநீர் அருந்துவதை ஒரு நாளைக்கு ஒன்று அல்லது இரண்டு கோப்பைகளாகக் குறைத்துக் கொள்ள வேண்டும்” எனக் கேட்டுக்கொண்டார்.
சீனி ஆலை உரிமையாளர்கள் மற்றும் இடைத்தரகர்களின் தலையீட்டினால் உருவாக்கப்படும் செயற்கைத் தட்டுப்பாடுகள் விலை உயர்வுக்கு முக்கிய காரணமாகின்றன. அத்தியாவசியப் பொருட்களின் விலை உயர்வு காரணமாகப் பணவீக்கம் அதிகரித்து, சாதாரண மக்களின் வாழ்வாதாரம் கடுமையாகப் பாதிக்கப்பட்டுள்ளது.
இலங்கையில் ஏற்பட்ட பொருளாதார நெருக்கடியின் போது எரிபொருள் மற்றும் உணவுப் பொருட்களுக்கு ஏற்பட்ட தட்டுப்பாட்டைப் போலவே, பாகிஸ்தானில் இன்று ‘தேநீரும் சீனியும்’ ஒரு பாரிய தேசிய நெருக்கடியாக உருவெடுத்துள்ளதாகப் பொருளாதார வல்லுநர்கள் சுட்டிக்காட்டுகின்றனர்.
