பிறக்கவிருக்கும் 2026 ஆம் ஆண்டு, ஒரு கண்கவர் வானியல் நிகழ்வுடன் தொடங்கவுள்ளது. வழக்கமான பௌர்ணமி நிலவை விடப் பெரியதாகவும், அதீத பிரகாசத்துடனும் காட்சியளிக்கும் ‘ஓநாய் சூப்பர் மூன்’ (Wolf Supermoon) எதிர்வரும் ஜனவரி மாதம் 3 ஆம் திகதி வானில் தோன்றி நம்மை வியப்பில் ஆழ்த்தவுள்ளது.
பழங்கால நம்பிக்கைகளின்படி, ஜனவரி மாதத்தின் கடும் பனிப்பொழிவின் போது உணவிற்காக அலையும் ஓநாய்கள் நிலவைப் பார்த்து ஊளையிடும் சத்தம் அதிகமாகக் கேட்கும் என்பதால், இம்மாத முழு நிலவை ‘ஓநாய் நிலவு’ என்று அழைக்கின்றனர்.
நிலவு பூமியைச் சுற்றி வரும் பாதை வட்ட வடிவில் இல்லாமல் நீள்வட்ட வடிவில் உள்ளது. இதில் பூமிக்கு மிக அருகில் நிலவு வரும் நிலையை ‘பெரிஜி’ (Perigee) என்று அழைப்பர். இந்த நிலையில் பௌர்ணமி நிகழும்போது, நிலவு வழக்கத்தை விட 14% பெரியதாகவும், 30% அதிக பிரகாசத்துடனும் தென்படும். இதனைத் தான் நாம் ‘சூப்பர் மூன்’ என்கிறோம்.
வானம் தெளிவாக இருக்கும் பட்சத்தில், உலகின் அனைத்துப் பகுதிகளில் இருந்தும் வெறும் கண்ணால் இந்த அழகிய காட்சியைக் காணலாம்.
இயற்கையின் இந்தக் கலைப்படைப்பை ரசிக்க ஜனவரி 3 ஆம் திகதி இரவு மறக்காமல் வானத்தைப் பாருங்கள்!
