நடிகர்களாகிய நாங்கள் அரசியல்வாதியாக மாறுவோம் என நடிகர் விஷால் தெரிவித்துள்ளார்.

சமீபத்தில் அரசியலுக்கு வருவேன் என்று கூறிய நடிகர் விஷால், தற்போது ரத்னம் படத்தினை விளம்பரப்படுத்த பல ஊர்களுக்கு பயணித்து வருகிறார்.

அந்த வகையில் திருச்சியில் கல்லூரி ஒன்றில் நடந்த நிகழ்ச்சியில் விஷால் கலந்து கொண்டார். பின்னர் செய்தியாளர்களிடம் பேசிய அவர்,

”சமூகத்தில் நடக்கும் தவறுகளுக்கு மாணவர்கள் குரல் கொடுக்க வேண்டும். நீங்கள் குரல் கொடுக்கவில்லை என்றால் மற்றவர்கள் உங்களை தவறாக பயன்படுத்திக் கொள்ள வாய்ப்புள்ளது. நடிகர் விஜய் மட்டுமல்ல; யார் வேண்டுமானாலும் அரசியலுக்கு வரலாம். அரசியல் என்பது பொழுதுபோக்கு அல்ல.

நான் அரசியலுக்கு வரக்கூடாது என்று வேண்டிக் கொள்ளுங்கள். அரசியல்வாதிகள் நடிகர்களாக மாறினால், நடிகர்களாகிய நாங்கள் அரசியல்வாதியாக மாறுவோம்.

ஓட்டுக்கு கொடுத்த பணம் மக்களுடைய பணம் தான். ஒரு MLAவுக்கு மாத சம்பளம் வெறும் இரண்டு லட்சம் ரூபாய் என இருக்கும்போது, அவர்களால் எப்படி ஓட்டுக்கு இவ்வளவு பணம் கொடுக்க முடிகிறது?” என கேள்வி எழுப்பினார்.

அத்துடன் நடிகர் சங்க கட்டிடம் குறித்து விஷால் பேசும்போது, ‘இந்த ஆண்டு இறுதிக்குள் நடிகர் சங்க கட்டிடம் கட்டி முடிக்கப்படும் என்ற விஷால், நடிகர் சங்க கட்டிடத்துக்கு விஜயகாந்த் பெயர் வைப்பது குறித்து நடிகர் சங்கங்களில் உள்ள பெரிய பெரிய ஜாம்பவான்களுடன் பொதுக்கூட்டத்தில் கலந்து பேசி முடிவு எடுக்கப்படும்’ என்றார்.

நடிகர் விஷால் தமிழ் சினிமாவில் முக்கிய நடிகராக இருந்து வருகிறார். தானும் நிச்சயம் அரசியலுக்கு வருவேன் என விஷால் சமீபத்தில் அறிவித்து இருந்தார். 2026 தேர்தலில் போட்டியிடுவேன் என்றும் அவர் கூறி இருக்கிறார்.

அடுத்து அவர் நடிப்பில் ரத்னம் என்ற படம் திரைக்கு வருகிறது. ஹரி இயக்கி இருக்கும் அந்த படத்தின் ட்ரைலரும் நேற்று வெளியாகி இருந்தது.

நடிகர் விஷால் தற்போது அளித்த பேட்டியில், ரெட் ஜெயண்ட் நிறுவனம் பற்றி கோபமாக பேசி இருக்கிறார்.

“ஒரு படத்தை தள்ளிப்போ என சொல்ல யாருக்கும் அதிகாரம் கிடையாது. சினிமா என் கையில் இருக்கு என சொன்னவர்கள் யாரும் உருபட்டதாக சரித்திரம் கிடையாது.”

“என் தயாரிப்பாளர் வட்டி கட்டி கொண்டிருக்கிறார். நீங்க ஏசி ரூமில் உட்கார்ந்துகொண்டு, அந்த படம் வரக்கூடாது என சொல்றீங்க. யாரு உங்களுக்கு அதிகாரம் கொடுத்தது. நீங்க தான் தமிழ் சினிமாவை குத்தகைக்கு எடுத்தீருக்கீங்களா என நான் கேட்டேன்”

“65 கோடி செலவு செய்திருக்கிறார் மார்க் ஆண்டனி தயாரிப்பாளர். செப்டம்பர் 15 ரிலீஸ் என ஒன்றரை மாதத்திற்கு முன்பே அறிவித்துவிட்டார். வேறு தேதியில் ரிலீஸ் செய்ய சொல்ல நீ யார்.”

“நீயும் ரிலீஸ் பண்ணு, நானும் ரிலீஸ் பண்றேன், மக்கள் முடிவு பண்ணட்டும் எந்த படத்தை பார்க்க வேண்டும் என்று. நீங்க மட்டும் தான் ரிலீஸ் பண்ணி சம்பாதிக்க வேண்டும் என ரூல் இருக்கிறதா” என விஷால் ஆவேசமாக கேட்டிருக்கிறார்.