புதிதாக முன்மொழியப்பட்டுள்ள ‘பயங்கரவாதத்திலிருந்து அரசை பாதுகாப்புச் சட்டம்’ குறித்து இந்தக் குழு தனது ஆழ்ந்த கவலையை வெளியிட்டுள்ளது. இந்தச் சட்டம் முந்தைய PTA சட்டத்தை விடவும் பாரிய மனித உரிமை மீறல்களுக்கு வழிவகுக்கலாம் என்று சுட்டிக்காட்டப்பட்டுள்ளது. எந்தவொரு பயங்கரவாத எதிர்ப்புச் சட்டமும் இலங்கையின் சர்வதேச மனித உரிமைப் பொறுப்புகளுக்கு இணங்க இருக்க வேண்டும் என்பதே உலக நாடுகளின் எதிர்பார்ப்பாக உள்ளது. அத்துடன், இராணுவத்தின் வசமுள்ள பொதுமக்களின் காணிகள் விடுவிக்கப்படும் வேகம் மிகவும் மந்தமாக இருப்பதாகவும் தூதுவர் எலினோர் சாண்டர்ஸ் குறிப்பிட்டுள்ளார்.

இலங்கையில் நல்லிணக்கத்தை ஏற்படுத்தும் நோக்கில், கடந்த கால மோதல்களில் உயிரிழந்தவர்களை நினைவு கூருவதற்குப் பல்வேறு சமூகங்களுக்கு அரசாங்கம் அனுமதி வழங்கியுள்ளமையை இந்தக் குழு வரவேற்றுள்ளது. இருப்பினும், நிலைமாறுகால நீதி மற்றும் மனித உரிமை மீறல் வழக்குகள் தொடர்பாக ஜனாதிபதி வழங்கிய வாக்குறுதிகள் கள அளவில் இன்னும் முழுமையாகச் செயல்படுத்தப்படவில்லை என்று தெரிவிக்கப்பட்டுள்ளது. குறிப்பாக, சாட்சிகள், பாதிக்கப்பட்டவர்கள் மற்றும் ஊடகவியலாளர்கள் மீதான அச்சுறுத்தல்கள் தொடர்வது கவலைக்குரிய விடயமாகக் கருதப்படுகிறது.

சுயாதீனமான உள்நாட்டு நிறுவனங்களின் அவசியத்தை வலியுறுத்திய தூதுவர், திட்டமிடப்பட்டுள்ள ‘சுயாதீன அரச வழக்குதொடுநர் அலுவலகம்’ வெறும் பேச்சளவில் இன்றிச் செயல்பாட்டுக்கு வர வேண்டும் எனக் கேட்டுக்கொண்டார். மேலும், மோதல் காலங்களில் இடம்பெற்ற பாலியல் வன்முறைகள் தொடர்பான ஐநா அறிக்கையை ஏற்றுக்கொண்ட முக்கிய குழு, பாதிக்கப்பட்டவர்களுக்கு உரிய நீதி கிடைப்பதை உறுதி செய்ய இலங்கை அரசாங்கம் ஆக்கபூர்வமான நடவடிக்கைகளை எடுக்க வேண்டும் என வலியுறுத்தியுள்ளது.