தேர்தல் புள்ளிவிவரங்களின்படி, தி.மு.க. கூட்டணி 1 கோடியே 54 இலட்சத்து 82 ஆயிரத்து 782 வாக்குகளைப் பெற்றுள்ளது. வெற்றி பெற்ற கட்சிக்கும் தி.மு.க.வுக்குமான வாக்கு சதவீத வேறுபாடு வெறும் 3.52 சதவீதம் மட்டுமே என்பதைச் சுட்டிக்காட்டியுள்ள அவர், மக்கள் தங்கள் மீது வைத்துள்ள நம்பிக்கை இப்போதும் வலிமையாகவே இருப்பதை இது காட்டுவதாகத் தெரிவித்தார். மேலும், வெற்றி பெற்ற வேட்பாளர்கள் அனைவரும் உடனடியாகத் தத்தமது தொகுதி மக்களை நேரில் சந்தித்து நன்றி தெரிவிக்க வேண்டும் என்றும் அவர் அறிவுறுத்தியுள்ளார்.

அரசியல் பொதுவாழ்வில் வெற்றியையும் தோல்வியையும் சமமாகக் கருதுபவர்கள் கழக உடன்பிறப்புகள் என்று குறிப்பிட்ட மு.க.ஸ்டாலின், தி.மு.க. ஏற்கனவே ஆறு முறை ஆட்சியில் இருந்த பேரியக்கம் என்றும், கொள்கைப் பயணத்தில் தளர்வின்றித் தொடர்வதே முக்கியம் என்றும் வலியுறுத்தினார். “உங்களால் உருவாக்கப்பட்ட எனக்கு நீங்கள் உடனிருக்கும் வரை எதைப் பற்றியும் கவலையில்லை” எனத் தொண்டர்களுக்குத் தனது நன்றியைப் புலப்படுத்திய அவர், தந்தை பெரியார், அண்ணா மற்றும் கலைஞர் காட்டிய பாதையில் இனம், மொழி காக்கும் பயணம் தொடரும் என உறுதி அளித்தார்.

ஆளும் கட்சியாக இருந்தபோது பல்வேறு மக்கள் நலத் திட்டங்களைத் தீட்டியதைப் போலவே, தற்போது ஒரு வலிமையான எதிர்க்கட்சியாக இருந்து மக்களுக்கான அரசியலைத் தொடரப் போவதாக அவர் அறிவித்துள்ளார். மக்களின் கோரிக்கைகளுக்காகவும், உரிமைகளுக்காகவும் சட்டமன்றத்திலும் மக்கள் மன்றத்திலும் தி.மு.க. தொடர்ந்து போராடும் என்றும், நூறாண்டு கண்ட திராவிடப் பேரியக்கத்தின் கொள்கைகளை நிலைநாட்ட மீண்டும் வெல்வோம் என்ற நம்பிக்கையையும் அவர் தனது அறிக்கையின் வாயிலாக வெளிப்படுத்தியுள்ளார்.

நடந்து முடிந்த இந்தத் தேர்தலில் தி.மு.க. மொத்தம் 59 இடங்களில் வெற்றி பெற்றுள்ளது. இதன் மூலம் சட்டமன்றத்தில் பிரதான எதிர்க்கட்சியாகச் செயல்படும் அந்தஸ்தை தி.மு.க. பெற்றுள்ளது. ஆளும் கட்சியாக இருந்த தி.மு.க., தற்போது எதிர்க்கட்சி வரிசையில் அமர வேண்டிய சூழல் உருவாகியுள்ளதால், அக்கட்சியின் அடுத்தகட்ட நகர்வுகள் குறித்து அரசியல் வட்டாரத்தில் பரவலாகப் பேசப்பட்டு வருகிறது.

குறிப்பாக, சென்னை கொளத்தூர் தொகுதியில் போட்டியிட்ட மு.க.ஸ்டாலின், இம்முறை மிகக் குறைந்த வாக்குகள் வித்தியாசத்தில் தோல்வியைத் தழுவியுள்ளது அக்கட்சியினரிடையே அதிர்ச்சியை ஏற்படுத்தியுள்ளது. இதன் காரணமாக அவர் எம்.எல்.ஏ. பதவியையும் இழந்துள்ள நிலையில், சட்டமன்றத்தில் எதிர்க்கட்சித் தலைவராக யார் நியமிக்கப்படுவார் என்ற எதிர்பார்ப்பு எழுந்துள்ளது. தற்போதுள்ள சூழலில், உதயநிதி ஸ்டாலின் எதிர்க்கட்சித் தலைவராகத் தேர்ந்தெடுக்கப்பட வாய்ப்புள்ளதாகத் தகவல்கள் கசிகின்றன.

முன்னதாக, தேர்தல் முடிவுகள் வெளியான பிறகு மு.க.ஸ்டாலின் தனது கூட்டணிக் கட்சித் தலைவர்களுடன் அவசர ஆலோசனை நடத்தினார். அப்போது நிலவிய அரசியல் சூழல் மற்றும் தேர்தல் முடிவுகள் குறித்து விரிவாக விவாதிக்கப்பட்டது. விரைவில் தி.மு.க.வின் சட்டமன்ற உறுப்பினர்கள் கூட்டம் நடைபெற்று, முறைப்படி எதிர்க்கட்சித் தலைவர் குறித்த அறிவிப்பு வெளியாகும் என எதிர்பார்க்கப்படுகிறது.