சில நாட்களுக்கு முன்பு நாடு முழுவதும் உள்ளூர் இணைய சேவைகளைத் துண்டித்த ஈரான் அரசு, தற்போது முதல் முறையாகச் செயற்கைக்கோள் மூலமான இணைய இணைப்புகளையும் இலக்கு வைத்து முடக்கியுள்ளது.

ஸ்டார்லிங்க் சேவையின் தரவுப் பரிமாற்றத்தில் (Uplink and Downlink) ஆரம்பத்தில் 30 சதவீதமாக இருந்த பாதிப்பு, சில மணிநேரங்களிலேயே 80 சதவீதத்திற்கும் மேலாக அதிகரித்துள்ளதாகத் தொழில்நுட்ப அறிக்கைகள் தெரிவிக்கின்றன.

உள்நாட்டு இணையம் துண்டிக்கப்படும் போது போராட்டக்காரர்கள் ஒருவருக்கொருவர் தொடர்புகொள்வதைத் தடுத்து, கலவரங்களைக் கட்டுப்படுத்துவதே அரசின் நோக்கமாக உள்ளது.

ஈரான் அரசு ஸ்டார்லிங்க் சேவைக்கு முறையான அனுமதி வழங்கவில்லை. இருப்பினும், அங்கு ஸ்டார்லிங்க் ரிசீவர்களின் (Receivers) பயன்பாடு அதிகரித்துள்ளதால், அவற்றை வைத்திருப்பது சட்டவிரோதமான செயலாகக் கருதப்படுகிறது.

எலன் மாஸ்க்கின் ஸ்டார்லிங்க் சேவை மூலம் போராட்டக் களத்திலிருந்து தகவல்கள் வெளியே கசிவதைத் தடுக்க ஈரான் இந்தத் தீவிர நடவடிக்கையை எடுத்துள்ளது. இணைய முடக்கம் காரணமாக அந்நாட்டின் உண்மை நிலவரங்களை உலகம் அறிந்துகொள்வதில் பெரும் சிக்கல் ஏற்பட்டுள்ளது.