மத்திய கிழக்கு பிராந்தியத்தை தனது கட்டுப்பாட்டில் கொண்டு வர முயன்ற ஈரான், வரலாற்றில் முதல்முறையாகத் தனது அண்டை நாடுகளிடம் தோல்வியைத் தழுவியுள்ளதாக ட்ரம்ப் விமர்சித்துள்ளார். ஈரானை இனி “மத்திய கிழக்கின் ரௌடி” என்று அழைக்க முடியாது என்றும், அவர்கள் “மத்திய கிழக்கின் தோல்வியாளர்” (THE LOSER OF THE MIDDLE EAST) என்றும் அவர் வர்ணித்துள்ளார். ஈரானின் இந்த வீழ்ச்சி நிலை பல தசாப்தங்களுக்குத் தொடரும் என்றும், அவர்கள் முழுமையாகச் சரணடையும் வரை அல்லது வீழ்ச்சியடையும் வரை இத்தகைய அழுத்தம் நீடிக்கும் என்றும் அவர் எச்சரித்துள்ளார்.

எவ்வாறாயினும், ட்ரம்ப்பின் இந்தச் சரணாகதி கூற்றை ஈரானியத் தலைமைத்துவம் முழுமையாக நிராகரித்துள்ளது. ஈரானிய ஜனாதிபதி மசூத் பெசெஷ்கியன் (Masoud Pezeshkian), அண்டை நாடுகளுடனான உறவை மேம்படுத்துவது குறித்துப் பேசியிருந்தாலும், அமெரிக்காவின் நிபந்தனையற்ற சரணாகதி கோரிக்கையைத் திட்டவட்டமாக நிராகரித்துள்ளார். ஈரான் அண்டை நாடுகளைத் தாக்குவதற்கான நோக்கம் கொண்டிருக்கவில்லை என்றும், தற்காப்பு நடவடிக்கைகளை மட்டுமே மேற்கொள்வதாகவும் அவர் தெளிவுபடுத்தியுள்ளார். இருப்பினும், தரைமட்டத்தில் போர் தொடர்ந்து கொண்டிருப்பதும், தாக்குதல்கள் தீவிரமடைவதும் பதற்றத்தைத் தணிக்கவிடாமல் தடுக்கின்றன.

இந்தச் சூழலில், ஈரானின் சில புதிய இலக்குகள் மற்றும் குழுக்கள் மீது தாக்குதல்களை நடத்தத் திட்டமிட்டு வருவதாகவும் ட்ரம்ப் எச்சரித்துள்ளார். ஈரானின் “மோசமான நடத்தை” தொடர்வதால், இதுவரை இலக்கு வைக்கப்படாத பல பகுதிகள் மீதும் முழுமையான அழிவை ஏற்படுத்தும் வகையிலான தாக்குதல்கள் பரிசீலிக்கப்பட்டு வருவதாக அவர் தனது பதிவில் குறிப்பிட்டுள்ளார். பிப்ரவரி 28 அன்று தொடங்கிய இந்த மோதல், ஈரானின் உச்ச தலைவர் அயத்துல்லா அலி கமேனியின் மறைவுக்குப் பிறகு பிராந்தியத்தில் ஒரு பாரிய அரசியல் மற்றும் இராணுவ வெற்றிடத்தை உருவாக்கியுள்ளது, இது நிலைமையை மேலும் சிக்கலாக்கியுள்ளது.