வளைகுடா பிராந்தியத்தை ஒட்டியுள்ள பகுதிகளில் நிலவும் போர்ச் சூழலை முன்னிட்டு, சர்வதேச கடற்பரப்பில் மீன்பிடி நடவடிக்கைகளில் ஈடுபடும் இலங்கை பல்தினம் கொண்ட மீன்பிடிப் படகுகளுக்கு (Multi-day boats) கடற்றொழில் திணைக்களம் விசேட பாதுகாப்பு அறிவுறுத்தல்களை வழங்கியுள்ளது. கடற்றொழில் திணைக்களத்தின் பணிப்பாளர் நாயகம் சுசந்த கஹவத்த விடுத்துள்ள அறிவிப்பில், மீனவர்கள் தங்களின் பாரம்பரிய கடல் எல்லைகளுக்குள் மட்டுமே மீன்பிடிக்க வேண்டும் என்றும், எக்காரணம் கொண்டும் ஆழ்கடல் பகுதிக்குச் செல்ல வேண்டாம் என்றும் வலியுறுத்தியுள்ளார். அறிமுகமில்லாத கப்பல்கள் அல்லது இராணுவ நடவடிக்கைகளில் ஈடுபடும் கப்பல்களின் அருகே செல்வதை முற்றிலும் தவிர்க்குமாறு அவர் கேட்டுக்கொண்டுள்ளார்.

கடலில் இருக்கும் போது ஏனைய கப்பல்களுடன் பொருட்களைப் பரிமாற்றிக் கொள்வதையோ அல்லது எந்தவொரு கொடுக்கல் வாங்கல் நடவடிக்கைகளிலும் ஈடுபடுவதையோ தவிர்க்குமாறு திணைக்களம் எச்சரித்துள்ளது. “போர்ச் சூழலில் சந்தேகத்திற்குரிய படகுகள் மீது தாக்குதல் நடத்தப்பட வாய்ப்புள்ளதால், மீனவர்கள் தங்களின் வழக்கமான கடல் வழிப் பாதைகளையே பின்பற்ற வேண்டும்” என அறிவுறுத்தப்பட்டுள்ளது. இதுவரை இலங்கை மீன்பிடிப் படகுகள் எதற்கும் பாதிப்பு ஏற்படவில்லை என்றாலும், முன்னெச்சரிக்கை நடவடிக்கையாகத் தரைக்கட்டுப்பாட்டு மையங்களுடன் (VMS) எப்போதும் தொடர்பில் இருக்குமாறு மீனவர்கள் அறிவுறுத்தப்பட்டுள்ளனர்.

ஏற்கனவே இந்தியப் பெருங்கடலில் ஈரானியப் போர்க்கப்பல் ஒன்று அமெரிக்க நீர்மூழ்கிக் கப்பலால் மூழ்கடிக்கப்பட்ட சம்பவத்தைத் தொடர்ந்து, பிராந்தியத்தின் பாதுகாப்பு நிலைமை மிகவும் சிக்கலாகியுள்ளது. இதேவேளை, கத்தார் நாட்டில் ஏவுகணைகள் இடைமறிக்கப்பட்டதைத் தொடர்ந்து அங்குள்ள பொதுமக்களுக்கு உயர்ந்த அவசர எச்சரிக்கை விடுக்கப்பட்டுள்ளது. இந்த ஒட்டுமொத்தப் போர்ச் சூழல் இலங்கையின் கடல்சார் பாதுகாப்பிலும் தாக்கத்தை ஏற்படுத்தியுள்ளதால், வட மற்றும் கிழக்கு மாகாண மீனவர்கள் மிகுந்த எச்சரிக்கையுடன் இருக்குமாறு கடற்படை மற்றும் கடலோர பாதுகாப்புப் படையினர் அறிவுறுத்தியுள்ளனர்.