கொழும்பு கோட்டை நீதவான் நீதிமன்றில் இன்று (28) இந்த வழக்கு மீண்டும் விசாரணைக்கு வந்தபோது, சட்டமா அதிபர் சார்பில் ஆஜரான மேலதிக சொலிசிட்டர் ஜெனரல் திலீப பீரிஸ் முக்கிய தகவல்களை வெளியிட்டார்:

முன்னாள் ஜனாதிபதி ரணில் விக்ரமசிங்க தொடர்பான விசாரணைகள் அனைத்தும் தற்போது முழுமையாக நிறைவடைந்துள்ளன. முன்னாள் ஜனாதிபதியின் செயலாளர் சமன் ஏகநாயக்க (சோமிசார பண்டார ஏகநாயக்க) தொடர்பான விசாரணைகள் இன்னும் ஒரு மாத காலத்திற்குள் நிறைவடையும் என எதிர்பார்க்கப்படுகிறது.

இந்த விசாரணைகள் அனைத்தும் முடிந்ததும், மார்ச் மாதம் மேல் நீதிமன்றத்தின் மூன்று நீதிபதிகள் கொண்ட அமர்வு (Trial-at-Bar) முன்னிலையில் குற்றப்பத்திரிகை தாக்கல் செய்யப்பட்டு வழக்கு விசாரணை ஆரம்பிக்கப்படும்.

இன்றைய விசாரணையின் போது, வழக்கில் இரண்டாவது சந்தேக நபராகப் பெயரிடப்பட்டுள்ள முன்னாள் ஜனாதிபதியின் செயலாளர் சமன் ஏகநாயக்கவை எதிர்வரும் பெப்ரவரி மாதம் 11 ஆம் திகதி வரை விளக்கமறியலில் வைக்குமாறு கோட்டை நீதவான் உத்தரவிட்டுள்ளார்.

ரணில் விக்ரமசிங்க ஜனாதிபதியாக இருந்தபோது, லண்டனில் நடைபெற்ற தனது மனைவியின் பட்டமளிப்பு விழாவில் கலந்துகொள்வதற்காகச் சுமார் 16.6 மில்லியன் ரூபா அரசு நிதியைத் தவறாகப் பயன்படுத்தியதாகக் குற்றம் சுமத்தப்பட்டுள்ளது. இது ஒரு தனிப்பட்ட விஜயம் எனத் தனது விசாரணைகள் மூலம் உறுதிப்படுத்தப்பட்டுள்ளதாகக் குற்றப் புலனாய்வுத் திணைக்களம் (CID) ஏற்கனவே நீதிமன்றில் தெரிவித்திருந்தது.

முன்னாள் ஜனாதிபதி ஒருவருக்கு எதிராக மார்ச் மாதம் மேல் நீதிமன்றத்தில் வழக்குத் தொடரப்படவுள்ளமை இலங்கையின் அரசியல் வரலாற்றில் மிக முக்கியமான ஒரு சட்ட நடவடிக்கையாகப் பார்க்கப்படுகிறது.