அரசு பல்கலைக்கழகங்களுக்குத் தெரிவு செய்யப்பட்ட கல்வி கூட்டுறவுச் சங்க (EDCS) உறுப்பினர்களின் பிள்ளைகளுக்காகப் புலமைப்பரிசில் வழங்கும் விழா இன்று அலரி மாளிகையில் நடைபெற்றது. இதன்போது 2,292 மாணவர்களுக்காக 13.7 மில்லியன் ரூபாவிற்கும் அதிக நிதி பகிர்ந்தளிக்கப்பட்டது.

1930 இல் வெறும் 58 உறுப்பினர்களுடன் தொடங்கிய EDCS, இன்று 2,15,000 உறுப்பினர்களுடன் தெற்காசியாவின் மிகப்பெரிய சங்கமாக வளர்ந்துள்ளது ஒரு சாதனை.

ஆண்டுதோறும் 3 இலட்சம் மாணவர்கள் பாடசாலைக்குச் சென்றாலும், 40,000 பேருக்கு மட்டுமே பல்கலைக்கழக வாய்ப்பு கிடைக்கிறது. இந்த அரிய வாய்ப்பைப் பெற்ற மாணவர்கள் நாட்டின் மாற்றத்தின் முன்னோடிகளாக மாற வேண்டும்.

கல்வித்துறையில் சீர்திருத்தங்களைக் கொண்டுவரும்போது ஏற்படும் தடைகளைத் தகர்த்து, தெளிவான இலக்குடன் முன்னோக்கிச் செல்வோம் எனப் பிரதமர் உறுதியளித்தார்.

இந்நிகழ்வில் கலந்துகொண்ட தொழிலாளர் துறை பிரதி அமைச்சர் மஹிந்த ஜயசிங்க குறிப்பிடுகையில் ஊழலற்ற நிர்வாகத்தினால் சங்கத்தின் நிதி ஸ்திரத்தன்மை கடந்த 9 மாதங்களில் 1,200 மில்லியன் ரூபாயிலிருந்து 1,700 மில்லியன் ரூபாய் வரை உயர்ந்துள்ளது.

இம்முறை தெரிவு செய்யப்பட்ட ஒரு மாணவருக்கு அதிகபட்சமாக 75,000 ரூபா வரை புலமைப்பரிசில் வழங்கப்படுகிறது.

மேல் மாகாண கல்விப் பணிப்பாளர் தர்ஷனி இத்தமல்கொட உள்ளிட்ட பல அதிகாரிகள் கலந்துகொண்ட இந்நிகழ்வு, மாணவர்களின் கல்வி ஆர்வத்தை ஊக்குவிக்கும் முக்கிய மைல்கல்லாக அமைந்தது.

“எனக்கு எதிராக நம்பிக்கையில்லாப் பிரேரணையைக் கொண்டுவர வேண்டிய அவசியமில்லை. பிரதமர் பதவியில் மாற்றம் வேண்டும் என நாட்டு மக்கள் தீர்மானித்தால், நான் இப்போதே வீட்டிற்குச் செல்லத் தயாராக இருக்கிறேன். நான் கட்டுப்படுவது நாட்டு மக்களுக்கும் எனது மனசாட்சிக்கும் மட்டுமே” எனப் பிரதமர் சபையில் தெரிவித்தார்.

ஜனாதிபதியை வீட்டுக்கு அனுப்புவதாகக் கூறி தோல்வியடைந்த எதிர்க்கட்சியினர், இப்போது பிரதமரை வீட்டுக்கு அனுப்பும் ‘பகல் கனவு’ காண்கிறார்கள். அது ஒருபோதும் பலிக்காது என அவர் குறிப்பிட்டார்.

பல்கலைக்கழகங்கள் (திருத்தச்) சட்டமூலம் மீதான விவாதத்தில் உரையாற்றிய அவர்,இச்சட்டம் பல்கலைக்கழக கட்டமைப்பை அரசியல்மயமாக்கும் என்ற எதிர்க்கட்சியினரின் குற்றச்சாட்டை அவர் மறுத்தார். 1978-ஆம் ஆண்டு சட்டத்தில் உள்ள நடைமுறைச் சிக்கல்களைத் தீர்க்கவே இந்தத் திருத்தம் கொண்டுவரப்பட்டுள்ளதாக விளக்கமளித்தார்.

தரம் 6 முதல் 13 வரை மாணவர்களுக்கு நடைமுறைக்குச் சாத்தியமான, சர்வதேச சவால்களை எதிர்கொள்ளக்கூடிய கல்வித் திட்டத்தை அறிமுகப்படுத்துவதே அரசாங்கத்தின் இலக்கு.

தரம் 6 பாடப்புத்தகத்தில் ஏற்பட்ட தவறை அரசாங்கம் ஏற்றுக்கொண்டுள்ளதுடன், அதனைத் திருத்துவதற்கான நடவடிக்கைகளும் எடுக்கப்பட்டுள்ளன. இதனை வைத்து அரசியல் செய்ய வேண்டாம் என அவர் கேட்டுக்கொண்டார்.

கடந்த சில வாரங்களாகத் தரம் 6 ஆங்கிலப் பாடப்புத்தகம் மற்றும் கல்வி மறுசீரமைப்புத் திட்டங்களுக்கு எதிராக எதிர்க்கட்சியினர் கடுமையான விமர்சனங்களை முன்வைத்து வந்தனர். இந்நிலையில், பிரதமருக்கு எதிராக நம்பிக்கையில்லாப் பிரேரணையைக் கொண்டுவரப் போவதாக எதிர்க்கட்சி அறிவித்திருந்தது. அதற்குப் பதிலளிக்கும் வகையிலேயே நேற்றைய விவாதம் அமைந்திருந்தது.