கேகாலை பகுதியில் சேதமடைந்த வீதிகள் மற்றும் பாலங்களைப் புனரமைக்கும் பணிகளைச் செவ்வாய்க்கிழமை (டிசம்பர் 9) பார்வையிட்டதன் பின்னர் ஊடகங்களுக்குக் கருத்துத் தெரிவிக்கையில் அமைச்சர் மேற்கண்டவாறு குறிப்பிட்டார்.

“ஊழலற்ற அரச நிர்வாகத்தை அமுல்படுத்தியுள்ளதால் தான் உலக நாடுகள் அனைத்தும் ஜனாதிபதி மீது நம்பிக்கை கொண்டு உதவிக் கரம் நீட்டியுள்ளன.”

“நெருக்கடியான நிலையில் முன்னாள் ஜனாதிபதி சந்திரிக்கா பண்டாரநாயக்க குமாரதுங்க 25 கோடி ரூபா நன்கொடை வழங்கியுள்ளமை வரவேற்கத்தக்கது. அவருக்கு நன்றி தெரிவித்துக் கொள்கிறேன். அவரது செயற்பாடு ஏனையவர்களுக்குச் சிறந்த எடுத்துக்காட்டு.”

அனர்த்தத்தால் ஏற்பட்ட அழிவில் இருந்து மீண்டெழுவதற்கு அரசாங்கம் என்ற அடிப்படையில் முழுமையான ஒத்துழைப்பு வழங்குவோம். பாதிக்கப்பட்ட அனைவருக்கும் நிவாரணம் வழங்கப்படும்.

அரச அதிகாரிகள் நெருக்கடி நிலைமையைப் புரிந்துகொண்டு அர்ப்பணிப்புடன் செயற்படுவது வரவேற்கத்தக்கது. அமைச்சர் பிமல் ரத்நாயக்க எதிர்க்கட்சிகளின் செயற்பாடுகளைக் கடுமையாக விமர்சித்தார்:

“நாடு என்ற ரீதியில் இயற்கை அனர்த்தத்தை எதிர்க்கொண்டுள்ளதை போன்று எதிர்க்கட்சிகளின் அரசியல் வங்குரோத்தாகக் குற்றச்சாட்டுகளையும் எதிர்கொண்டுள்ளோம். நெருக்கடியான நிலையில் எங்கு குறைகள் உள்ளது என்பதைத் தேடிக்கொண்டு இவர்கள் திரிகிறார்கள்.”

நெருக்கடி நிலையில் இருந்து மீள்வதற்கு அரசாங்கத்துக்கு முழுமையான ஒத்துழைப்பு வழங்குவதாக எதிர்க்கட்சியினர் ஊடகங்களில் மாத்திரம் தான் குறிப்பிடுகிறார்கள். ஆனால் எவ்விதத்திலும் இவர்கள் ஒத்துழைப்பு வழங்கவில்லை; மாறாக நெருக்கடிக்குள்ளாக்கும் வகையில்தான் செயற்படுகிறார்கள்.

“எதிர்க்கட்சியின் தலைவர்கள் அனர்த்த நிலைமையின் போது கண்டிக்குச் சென்று அரச அதிகாரிகளுக்கு அச்சுறுத்தல் விடுத்துள்ளார்கள்.”

இவ்வாறானவர்களின் செயற்பாடுகளை அரச அதிகாரிகள் கவனத்திற்கொள்ளக் கூடாது. வழங்கப்பட்டுள்ள பொறுப்புக்கள் மற்றும் கடமைகளைச் சிறந்த முறையில் செயற்படுத்த வேண்டும் என்று அரச அதிகாரிகளிடம் கேட்டுக்கொள்கிறோம்.

இறுதியாக, மக்களுக்காக மக்களிடமிருந்து கிடைக்கும் ஒவ்வொரு ரூபாவையும் மக்களுக்காகப் பயன்படுத்துவோம் என்றும் அவர் உறுதியளித்தார்.