வானிலை முன்னறிவிப்பின்படி, நாளை (ஏப்ரல் 09, 2026) பிற்பகல் 2.00 மணிக்குப் பின்னர் மேற்கு, சபரகமுவ மற்றும் வடமேற்கு மாகாணங்களிலும், காலி, மாத்தறை, கண்டி, நுவரெலியா மற்றும் மன்னார் மாவட்டங்களிலும் சில இடங்களில் மழை அல்லது இடியுடன் கூடிய மழை பெய்ய வாய்ப்புள்ளது. நாட்டின் ஏனைய பகுதிகளில் பெரும்பாலும் வறண்ட வானிலையே நிலவும் என எதிர்பார்க்கப்படுகிறது. அத்துடன் மத்திய, சபரகமுவ மற்றும் ஊவா மாகாணங்களின் சில பகுதிகளில் அதிகாலை வேளையில் நிலவும் மூடுபனி காரணமாகப் பார்வைத் தெளிவு குறையக்கூடும் எனவும் தெரிவிக்கப்பட்டுள்ளது.

மேற்கு, சபரகமுவ, தெற்கு, ஊவா மற்றும் வடமேற்கு மாகாணங்களிலும், கண்டி மற்றும் நுவரெலியா மாவட்டங்களிலும் இடியுடன் கூடிய மழையின் போது தற்காலிகமாகப் பலத்த காற்று வீசக்கூடும். குறிப்பாக, இடிமின்னல் தாக்கங்களிலிருந்து தங்களைப் பாதுகாத்துக் கொள்ள திறந்தவெளிகளில் இருப்பதைத் தவிர்க்குமாறும், மின்சாதனப் பயன்பாட்டில் எச்சரிக்கையாக இருக்குமாறும் பொதுமக்கள் கேட்டுக்கொள்ளப்பட்டுள்ளனர்.

சூரியனின் வடக்கு நோக்கிய நகர்வு காரணமாக, ஏப்ரல் 5 முதல் 15 ஆம் தேதி வரை சூரியன் இலங்கைக்கு நேர் உச்சியில் காணப்படுகிறது. அந்தவகையில், நாளை (09) நண்பகல் 12:12 மணியளவில் சிலாபம், பிங்கிரிய, ஹல்மில்லவெவ, பண்டுவஸ்நுவர, கொகரெல்ல, கவுடுபெலல்ல, கொப்பாவெளி மற்றும் கிரங்குளம் ஆகிய பகுதிகளில் சூரியன் தலைக்கு நேர் மேலே காணப்படும் என வளிமண்டலவியல் திணைக்களம் மேலும் குறிப்பிட்டுள்ளது.