புத்தாண்டு தினமான இன்று அதிகாலை 2.45 மணியளவில் இச்சம்பவம் இடம்பெற்றுள்ளது.

வீதிச் சோதனையில் ஈடுபட்டிருந்த பொலிஸார், சந்தேகத்திற்கிடமான வெள்ளை நிற கார் ஒன்றை நிறுத்துமாறு சமிக்ஞை செய்துள்ளனர். எனினும், சாரதி பொலிஸாரின் கட்டளையை மீறி அவர்கள் மீது காரை மோதிவிட்டுத் தப்பிச் சென்றுள்ளார்.

இச்சம்பவத்தில் பலத்த காயமடைந்த பொலிஸ் கான்ஸ்டபிள் சரத் என்பவர் ஹம்பாந்தோட்டை மாவட்ட பொது மருத்துவமனையில் அனுமதிக்கப்பட்ட பின்னர் உயிரிழந்தார்.

சம்பவத்தின் போது பணியிலிருந்த மற்றொரு பொலிஸ் கான்ஸ்டபிள் மற்றும் ஒரு சிவில் பாதுகாப்பு அதிகாரி ஆகியோரும் காயமடைந்துள்ளனர். சிவில் பாதுகாப்பு அதிகாரி அம்பலந்தோட்டை பிராந்திய மருத்துவமனையில் சிகிச்சை பெற்று வருகின்றார்.

விபத்தை ஏற்படுத்திய கார் தங்கல்லையில் இருந்து கதிர்காமம் நோக்கிச் சென்ற வாகனம் என அடையாளம் காணப்பட்டுள்ளது. விபத்தின் பின்னர் குறித்த கார் ஹம்பாந்தோட்டை நோக்கி அதிவேகமாகத் தப்பிச் சென்றுள்ளது.

சந்தேக நபர்களையும் வாகனத்தையும் கைது செய்வதற்கான தீவிர விசாரணைகளை அம்பலந்தோட்டை பொலிஸார் முன்னெடுத்து வருகின்றனர். புத்தாண்டின் அதிகாலை வேளையில் கடமையில் இருந்த அதிகாரி உயிரிழந்தமை பொலிஸ் திணைக்களத்தில் பெரும் சோகத்தை ஏற்படுத்தியுள்ளது.