கடந்த ஏப்ரல் 11-ஆம் திகதி நள்ளிரவு முதல் நாளை நள்ளிரவு வரை, பண்டிகை கால பயணங்களை எளிதாக்கும் நோக்கில் கியூ.ஆர் குறியீடு இன்றி பெட்ரோல் பெற்றுக்கொள்ள அனுமதி வழங்கப்பட்டிருந்தது. இருப்பினும், இந்தக் காலப்பகுதியில் வாகன இலக்கத் தகட்டின் இறுதி இலக்கம் (ஒற்றை/இரட்டை) அடிப்படையிலான விநியோக முறைமை அமுலில் இருந்தது. நாளை நள்ளிரவு முதல் மீண்டும் பழையபடி கியூ.ஆர் ஒதுக்கீட்டின் (Quota) அடிப்படையிலேயே எரிபொருள் விநியோகிக்கப்படும்.

மத்திய கிழக்கில் நிலவும் போர்ச் சூழல் காரணமாக உலகளாவிய ரீதியில் எரிபொருள் விநியோகத்தில் ஏற்பட்டுள்ள சிக்கல்களைக் கருத்திற்கொண்டு, இலங்கையில் எரிபொருள் கையிருப்பினைச் சீராகப் பேணுவதற்காக கடந்த மார்ச் மாதம் 15-ஆம் திகதி முதல் கியூ.ஆர் முறை மீண்டும் கட்டாயமாக்கப்பட்டது. தற்காலிகமாக வழங்கப்பட்ட ஒரு வார கால விடுப்பு தற்போது நிறைவடைவதால், பொதுமக்கள் மீண்டும் தமது கியூ.ஆர் குறியீடுகளைப் பயன்படுத்தத் தயாராக இருக்குமாறு கேட்டுக்கொள்ளப்பட்டுள்ளனர்.

எரிபொருள் நிரப்பு நிலையங்களில் தேவையற்ற நெரிசலைத் தவிர்க்கவும், முறையான விநியோகத்தை உறுதிப்படுத்தவும் பொலிஸார் மற்றும் பாதுகாப்புப் படையினர் கண்காணிப்புப் பணிகளில் ஈடுபடுத்தப்பட உள்ளனர். பொதுமக்கள் தேவையற்ற முறையில் எரிபொருளைச் சேமித்து வைப்பதைத் தவிர்க்குமாறும், தமக்கு ஒதுக்கப்பட்டுள்ள அளவினை மாத்திரம் பெற்றுக்கொள்ளுமாறும் மின்சக்தி மற்றும் எரிசக்தி அமைச்சு அறிவுறுத்தியுள்ளது.