சமந்தா நடிப்பில் உருவாகியுள்ள ‘மா இண்டி பங்காரம்’ (Maa Inti Bangaram) என்ற தெலுங்குத் திரைப்படத்தின் டிரெய்லர் விரைவில் வெளியாகவுள்ளது. சுமார் 3 ஆண்டுகளுக்குப் பிறகு சமந்தா நடிப்பில் வெளியாகும் படம் என்பதால் அவரது ரசிகர்கள் பெரும் எதிர்பார்ப்புடன் காத்திருக்கின்றனர்.

இந்தப் படத்தின் மூலம் அவர் நடிகையாக மட்டுமல்லாமல், தயாரிப்பாளராகவும் தனது புதிய பயணத்தைத் தொடங்கியுள்ளார்.

கடந்த மாதம் கோவையில் இயக்குநர் ராஜ் நிடிமொருவை ரகசியத் திருமணம் செய்துகொண்டதாக எழுந்த செய்திகள் மற்றும் தேனிலவு கொண்டாட்டங்களைத் தொடர்ந்து, சமந்தா மீண்டும் படப்பிடிப்புகளில் பிஸியாகியுள்ளார்.

சமந்தா தனது புதிய பட அறிவிப்பை “குட் நியூஸ்” என்று பதிவிட்டிருந்த நிலையில், சமூக வலைதளங்களில் ரசிகர்கள் கலகலப்பான கமெண்ட்களைப் பகிர்ந்து வருகின்றனர். “நாங்க திருமண வாழ்க்கை அல்லது வாரிசு குறித்த வேறு விதமான ‘குட் நியூஸ்’ எதிர்பார்த்தோமே…” எனச் சிலர் கிண்டலாகப் பதிவிட்டு வந்தாலும், அவரது மீள்வருகையைக் கொண்டாடத் திரையுலகமே தயாராகி வருகிறது.