இதுவரை ஆளும் கட்சியின் மத்திய குழுவின் துணைத் துறைப் பணிப்பாளராக (Vice Department Director) இருந்த கிம் யோ ஜாங், தற்போது முழுத் துறைப் பணிப்பாளராக (Full Department Director) பதவி உயர்த்தப்பட்டுள்ளார். இது வடகொரிய அரசியல் கட்டமைப்பில் ஒரு அமைச்சருக்கு இணையான உயர்மட்டப் பதவியாகக் கருதப்படுகிறது. அத்துடன், அவர் கட்சியின் மிக முக்கியமான முடிவுகளை எடுக்கும் ‘பொலிட்பீரோ’ (Politburo) அமைப்பிலும் மீண்டும் இணைக்கப்பட்டுள்ளார். இதன் மூலம் சர்வதேச விவகாரங்கள், குறிப்பாகத் தென்கொரியா மற்றும் அமெரிக்காவுடனான உறவுகளைக் கையாள்வதில் அவர் இனி நேரடி அதிகாரத்தைச் செலுத்துவார் என எதிர்பார்க்கப்படுகிறது.

கிம் ஜாங் உன்னின் நிழலாகவும், அவருக்கு மிகவும் நம்பிக்கைக்குரிய ஆலோசகராகவும் இருந்து வரும் கிம் யோ ஜாங், வடகொரியாவின் மிகச் செல்வாக்கு மிக்கப் பெண்ணாக உருவெடுத்துள்ளார். அண்மைக்காலமாகத் தனது மகளான கிம் ஜு ஏ-வை கிம் ஜாங் உன் பொது மேடைகளில் முன்னிலைப்படுத்தி வரும் நிலையில், தங்கையின் இந்தப் பதவி உயர்வு வடகொரியாவின் உள்நாட்டு அரசியலில் பெரும் முக்கியத்துவம் வாய்ந்ததாகப் பார்க்கப்படுகிறது. ஐந்து ஆண்டுகளுக்கு ஒருமுறை நடைபெறும் இந்த மாநாட்டின் ஊடாக, கிம் ஜாங் உன் தனது 15 ஆண்டுகால ஆட்சியை மேலும் உறுதிப்படுத்தியுள்ளதுடன், அடுத்த ஐந்தாண்டு காலத்திற்கான பொருளாதார மற்றும் இராணுவ இலக்குகளையும் நிர்ணயித்துள்ளார்.