சமீபத்தில் அளித்த பேட்டி ஒன்றில் படப்பிடிப்புத் தளத்தில் நடந்த நிகழ்வுகளைப் பகிர்ந்து கொண்ட சிவராஜ்குமார், “ஜெயிலர் 2 படப்பிடிப்பு தளத்தில் ரஜினி சாரும் நானும் மிகவும் நெருக்கமாகப் பழகுவோம். எங்களைப் பார்க்கும் போதெல்லாம் எஸ்.ஜே. சூர்யா நகைச்சுவையாகக் கமெண்ட் செய்வார். வாய்ப்பு கிடைத்தால் போதும், இந்த இருவரும் பழைய உறவினர்களைப் போல் பேசத் தொடங்கி விடுவார்கள் என்று அவர் கிண்டல் செய்வார். உண்மையில் நாங்கள் அப்படிதான்” எனக் குறிப்பிட்டுள்ளார். இதன் மூலம் எஸ்.ஜே. சூர்யா இந்தப் படத்தில் ஒரு முக்கிய கதாபாத்திரத்தில் (பெரும்பாலும் வில்லனாக) நடிப்பது அதிகாரப்பூர்வமற்ற முறையில் உறுதியாகியுள்ளது.

இந்தப் படத்தில் முதல் பாகத்தில் நடித்த ரம்யா கிருஷ்ணன், யோகி பாபு, மிர்ணா மேனன் ஆகியோருடன் இணைந்து மலையாள நடிகர் மோகன்லால் மற்றும் சிவராஜ்குமார் மீண்டும் கௌரவத் தோற்றத்தில் நடிக்கின்றனர். மேலும், மிதுன் சக்கரவர்த்தி மற்றும் விஜய் சேதுபதி ஆகியோரும் இந்தப் பிரம்மாண்ட நட்சத்திரப் பட்டாளத்தில் இணைந்துள்ளதாகத் தகவல்கள் தெரிவிக்கின்றன. முதல் பாகத்தில் ‘நரசிம்மா’ கதாபாத்திரத்தில் சில நிமிடங்களே வந்து மாஸ் காட்டிய சிவராஜ்குமாருக்கு, இரண்டாம் பாகத்தில் கூடுதல் காட்சிகள் இருக்கும் என அவர் முன்னரே தெரிவித்திருந்தது குறிப்பிடத்தக்கது.

சன் பிக்சர்ஸ் தயாரிக்கும் இந்தப் படத்திற்கு அனிருத் இசையமைக்கிறார். தற்போது கேரளா மற்றும் கோயம்புத்தூர் எல்லைப் பகுதிகளில் படப்பிடிப்பு விறுவிறுப்பாக நடைபெற்று வருகிறது. சூப்பர்ஸ்டார் ரஜினிகாந்த் அண்மையில் அளித்த பேட்டி ஒன்றில், ‘ஜெயிலர் 2’ திரைப்படத்தை 2026 ஆம் ஆண்டு ஜூன் மாதம் 12 ஆம் தேதி வெளியிடத் திட்டமிட்டுள்ளதாகத் தெரிவித்துள்ளார். எஸ்.ஜே. சூர்யாவின் வில்லத்தனமும், ரஜினியின் ஸ்டைலும் இணையும் இந்தப் படம் பாக்ஸ் ஆபிஸில் புதிய சாதனைகளை எழுதும் என எதிர்பார்க்கப்படுகிறது.