கடந்த வெள்ளிக்கிழமை (26) யாழ். மாவட்ட செயலகத்தில் நடைபெற்ற மாவட்ட அபிவிருத்திக் குழுக் கலந்துரையாடலின் போதே அவர் இந்தத் தகவலை வெளியிட்டார்.

உள்ளக விளையாட்டு அரங்கு அமையவுள்ள காணி தொடர்பான வழக்கு யாழ்ப்பாண நீதிமன்றத்தில் நிலுவையில் உள்ளது. சட்டச் சிக்கல்கள் காரணமாக கட்டுமானப் பணிகளைத் தொடர முடியாத நிலை ஏற்பட்டுள்ளது.

ஒதுக்கப்பட்ட நிதி செலவு செய்யப்படாமல் திரும்பப் போவதைத் தவிர்க்கும் நோக்கில், அது கட்டிடங்கள் திணைக்களத்திற்கு மாற்றப்படவுள்ளது.

நீதிமன்றத் தீர்ப்பு சாதகமாக அமைந்தால் அதே இடத்தில் கட்டுமானப் பணிகள் ஆரம்பிக்கப்படும். அவ்வாறில்லை எனில், மாற்று நிலம் ஒன்றைத் தெரிவு செய்து அங்கு விளையாட்டு அரங்கினை அமைக்க நடவடிக்கை எடுக்கப்படும் என அரசாங்க அதிபர் மேலும் விளக்கமளித்துள்ளார்.

யாழ்ப்பாண இளைஞர், யுவதிகளின் விளையாட்டுத் திறன்களை மேம்படுத்த மிக அவசியமான இந்தத் திட்டம், சட்டச் சிக்கல்களால் இழுபறி நிலையில் இருப்பது கவலையளிப்பதாகப் பலரும் சுட்டிக்காட்டியுள்ளனர்.

நீண்டகாலச் சமூகப் பிரச்சினைகள் மற்றும் சவால்களின் பின்னர் மீள்நிலைக்குத் திரும்பி வரும் வடக்கு மாகாணத்தில் விளையாட்டுக்களை ஊக்குவிப்பதற்காகவும், விளையாட்டுக்கான உட்கட்டமைப்பு வசதிகளை அபிவிருத்தி செய்தலும் மிகவும் முக்கியமானதெனக் கண்டறியப்பட்டுள்ளது.

பாடசாலைகளிலும் விளையாட்டுக் கழகங்களிலும் மேசைப் பந்து (Table Tennis), டென்னிஸ், பூப்பந்து (Badminton), வலைப்பந்து (Netball), சதுரங்கம் போன்ற உள்ளக விளையாட்டுக்களை அபிவிருத்தி செய்யும் நோக்கில் இந்த அரங்கு நிர்மாணிக்கப்படவுள்ளது.

இந்த வசதிகளுடன் கூடிய யாழ்ப்பாண உள்ளக விளையாட்டரங்கு, 170 மில்லியன் ரூபாய்கள் மதிப்பீட்டுச் செலவில் நிர்மாணிக்கப்படவுள்ளது.