இலங்கை அணி தனது முதல் போட்டியில் அயர்லாந்தை 20 ரன்கள் வித்தியாசத்திலும், ஓமானுக்கு எதிராக 105 ரன்கள் வித்தியாசத்தில் இமாலய வெற்றியையும் பதிவு செய்து அதிரடியாகத் தொடங்கியது. இருப்பினும், சூப்பர்-8 சுற்றில் இங்கிலாந்திடம் 51 ரன்கள் வித்தியாசத்தில் தோல்வியடைந்த நிலையில், கொழும்பில் நடைபெற்ற வாழ்வா-சாவா போரில் நியூசிலாந்திடம் 61 ரன்கள் வித்தியாசத்தில் சரணடைந்தது. குறிப்பாக, பவர்பிளே ஓவர்களிலேயே விக்கெட்டுகளைப் பறிகொடுத்துப் பேட்டிங்கில் ஏற்பட்ட பலவீனமான சரிவே இந்தத் தோல்விக்கு முக்கிய காரணமாக அமைந்தது.

நியூசிலாந்துக்கு எதிரான போட்டியில் டாஸ் வென்ற இலங்கை அணி, முதலில் பந்துவீச்சைத் தேர்வு செய்தது பெரும் சர்ச்சையை ஏற்படுத்தியுள்ளது. இது குறித்துக் கருத்து தெரிவித்துள்ள முன்னாள் இந்திய வீரர் இர்ஃபான் பதான், “கடந்த போட்டியில் இங்கிலாந்துக்கு எதிராக 146 ரன்களைத் துரத்தத் தவறிய பின்னரும், ஆடுகளம் சுழற்பந்து வீச்சுக்குச் சாதகமாக இருக்கும்போது இலங்கை ஏன் மீண்டும் இலக்கைத் துரத்த (Chase) முற்பட்டது?” எனக் கேள்வி எழுப்பியுள்ளார். இவரின் இந்தக் கருத்து இலங்கை ரசிகர்களின் ஒட்டுமொத்த ஆதங்கத்தைப் பிரதிபலிப்பதாகச் சமூக வலைதளங்களில் பகிரப்பட்டு வருகிறது.

தோல்விக்குப் பின்னர் ரசிகர்களிடம் மன்னிப்புக் கோரியுள்ள கேப்டன் தசுன் ஷனகாவின் பேச்சு, ரசிகர்களைத் திருப்திப்படுத்தவில்லை. ‘மீண்டும் மீண்டும் தோல்விகள்’, ‘பொறுப்புக்கூறல் இல்லாமை’ எனச் சமூக வலைதளங்கள் எங்கும் இலங்கை கிரிக்கெட் (SLC) நிர்வாகத்திற்கு எதிரான வாசகங்கள் வைரலாகி வருகின்றன. மூத்த வீரர்களை நீக்கிவிட்டு, புதிய தலைமை மற்றும் பயிற்சி ஊழியர்களுடன் அணியை முழுமையாக மாற்றியமைக்க வேண்டும் என்ற கோரிக்கை வலுத்துள்ளது. ஏற்கனவே தொடரிலிருந்து வெளியேறிவிட்ட நிலையில், பாகிஸ்தானுடனான இலங்கையின் அடுத்த போட்டி வெறும் சம்பிரதாயமாகவே அமையவுள்ளது.