ஈரான் நிபந்தனையின்றி சரணடைந்த பின்னர், அமெரிக்காவும் அதன் கூட்டணி நாடுகளும் இணைந்து ஈரானின் பொருளாதாரத்தை மீண்டும் கட்டமைக்கப் போவதாக ட்ரம்ப் உறுதியளித்துள்ளார். அந்நாட்டின் எதிர்காலத்தை மேம்படுத்தவும், முன்னெப்போதையும் விட வலிமையான பொருளாதாரத்தை உருவாக்கவும் தாங்கள் அயராது உழைக்கத் தயார் என்றும் அவர் தனது சமூக வலைத்தளப் பக்கத்தில் பதிவிட்டுள்ளார். “ஈரானுக்கு ஒரு சிறந்த எதிர்காலம் காத்திருக்கிறது” என்ற நம்பிக்கையைத் தெரிவித்துள்ள அவர், இதற்கான ஆரம்பகட்ட நடவடிக்கைகளைத் தாங்கள் மேற்கொள்ளவிருப்பதாகவும் குறிப்பிட்டுள்ளார்.

இந்த மோதலில் ஈரானின் ஆன்மீகத் தலைவர் அலி கமேனி கொல்லப்பட்டதை அடுத்து, அந்நாட்டின் புதிய தலைமைத்துவத்தைத் தேர்ந்தெடுப்பதிலும் அமெரிக்கா முக்கியப் பங்கு வகிக்கும் என்று ட்ரம்ப் ஏற்கனவே அறிவித்திருந்தது குறிப்பிடத்தக்கது. ஈரானிய அரசாங்கத்தின் தற்போதைய போக்கை மாற்றியமைக்கவும், பிராந்தியத்தில் அமைதியை நிலைநாட்டவும் அமெரிக்கா தலைமையிலான கூட்டணி நாடுகள் முழுவீச்சில் செயல்பட்டு வருகின்றன. ஈரானியத் தலைமைத்துவம் தற்போது பேச்சுவார்த்தைகளுக்கு முயற்சிப்பதாகத் தகவல்கள் கசிந்தாலும், ட்ரம்ப் அதற்கெல்லாம் “காலம் கடந்துவிட்டது” என்று மறுப்புத் தெரிவித்துள்ளார்.

இதற்கிடையில், அமெரிக்காவின் இந்த அதிரடித் திட்டங்களை ஈரானிய அதிகாரிகள் முற்றாக நிராகரித்துள்ளனர். தங்களின் தேசத்தின் கௌரவம் மற்றும் இறையாண்மையைப் பாதுகாப்பதில் எந்தவொரு சமரசமும் இல்லை என்றும், வெளிநாடுகளின் தலையீட்டை ஒருபோதும் ஏற்கப்போவதில்லை என்றும் அவர்கள் எச்சரித்துள்ளனர். அமெரிக்கா மற்றும் இஸ்ரேலின் இந்த இராணுவ நடவடிக்கைகள் ஈரானின் கட்டமைப்புகளைத் தகர்த்துள்ள போதிலும், தரைவழி மோதல்களை எதிர்கொள்ளத் தாங்கள் முழுமையாகத் தயார் என்று ஈரானியப் பாதுகாப்புத் தரப்பு ஆவேசமாகத் தெரிவித்துள்ளது.

]]>