ஈரான் அணு ஆயுதங்களை நெருங்கியதாலும், நாளொன்றுக்கு நூற்றுக்கணக்கான ஏவுகணைகளை உற்பத்தி செய்யும் திறனைப் பெற்றிருந்ததாலுமே இஸ்ரேல் இந்தப் போரில் இறங்கியதாக அவர் விளக்கமளித்தார். “பி-2 ரக விமானங்கள் கூட ஊடுருவ முடியாத அளவிற்கு நிலத்தடியில் மறைத்து வைக்கப்பட்டிருந்த ஈரானின் ஏவுகணை மற்றும் அணுசக்தித் திட்டங்களை நாம் தாக்கியுள்ளோம். அவர்கள் எங்களைக் கழுத்தை நெரிக்க நினைத்தார்கள், இப்போது நாங்கள் அவர்களைக் கழுத்தை நெரித்துக் கொண்டிருக்கிறோம்,” என்று அவர் வரைபடத்தைக் காட்டித் தெரிவித்தார்.

ஈரானிடம் இன்னும் எஞ்சியுள்ள 400 கிலோகிராமுக்கும் அதிகமான செறிவூட்டப்பட்ட யுரேனியம், இராஜதந்திர ரீதியாகவோ அல்லது இராணுவ ரீதியாகவோ நிச்சயமாக அகற்றப்படும் என்று நெதன்யாகு மீண்டும் வலியுறுத்தினார். ஈரான் தற்போது பலவீனமடைந்துள்ளதாகவும், அது தப்பிப்பிழைப்பதற்காகவே போர் நிறுத்தத்திற்காக “மன்றாடி” வருவதாகவும் அவர் விமர்சித்தார். “நம்மை அழிக்க நினைத்தவர்கள், இன்று தங்களின் உயிர் பிழைப்பிற்காகப் போராடுகிறார்கள்; ஈரான் இனி பழைய ஈரான் அல்ல” என்றும் அவர் குறிப்பிட்டார்.

மேலும், லெபனானில் ஹிஸ்புல்லாவிற்கு எதிராக 8 முதல் 10 கிலோமீட்டர் தூரத்திற்குப் பாதுகாப்பு மண்டலம் உருவாக்கப்பட்டுள்ளதாகவும், வடக்குப் பகுதி இஸ்ரேலியர்களின் பாதுகாப்பை உறுதி செய்ய ஹிஸ்புல்லாவின் ஆயுதங்கள் முழுமையாகக் களையப்பட வேண்டும் என்றும் அவர் நிபந்தனை விதித்தார். ஹிஸ்புல்லாவிற்கு எதிரான இராணுவ நடவடிக்கைகள் தொடரும் அதேவேளை, லெபனானுடன் அடுத்த வாரம் அமெரிக்காவில் பேச்சுவார்த்தை நடத்தவுள்ளதாகவும், காசாவில் ஹமாஸுக்கு எதிரான தாக்குதல்கள் மீண்டும் தொடங்கப்படலாம் என்றும் அவர் சூசகமாகத் தெரிவித்தார்.