ஃபாக்ஸ் நியூஸ் தொலைக்காட்சியின் செய்தியாளர் லாரா இங்க்ராஹாம் (Laura Ingraham) உடன் அவர் நடத்திய நேர்காணலின் போது இந்தக் கருத்துக்களைத் தெரிவித்தார்.

H-1B விசா கட்டுப்பாடுகள் உங்கள் நிர்வாகத்துக்கு ஒரு பெரிய முன்னுரிமையாக இருக்குமா?

அதற்குப் பதிலளித்த ட்ரம்ப், “திறமையானவர்களை நாம் நமது நாட்டுக்குக் கொண்டு வர வேண்டும்” என்றார்.

அமெரிக்காவில் ஏராளமான திறமையாளர்கள் இருக்கிறார்களே என்று செய்தியாளர் சுட்டிக்காட்டியபோது, “இல்லை. இல்லை. அமெரிக்கர்களிடம் சில திறமைகள் இல்லை. அவர்கள் கற்றுக்கொள்ள வேண்டும். இங்கே வேலையில்லாமல் இருப்பவர்களை வேலைக்கு அமர்த்த வேண்டும் என்பதற்காக அவர்களை ஏவுகணைகளை உருவாக்கும் பணிக்கு நியமிக்க முடியாது” என்று ட்ரம்ப் தெரிவித்தார்.

சட்டவிரோத குடியேறிகளைக் கண்டறிவதற்காக ஜார்ஜியாவில் நடத்தப்பட்ட சோதனையின்போது தென் கொரியாவைச் சேர்ந்த மக்கள் பேட்டரிகளை உருவாக்கிக் கொண்டிருந்ததை ட்ரம்ப் சுட்டிக்காட்டினார்.

“பேட்டரிகளை உருவாக்குவது மிகவும் சிக்கலான வேலை. மிகவும் ஆபத்தானதும்கூட. அதிக அளவில் வெடிப்புகள் நிகழும். அவர்கள் 500 – 600 பேர் இருப்பார்கள். ஆனால், அவர்கள் நாட்டை விட்டு வெளியேற வேண்டும் என்று அவர்கள் (ஜார்ஜியா) விரும்புகிறார்கள். இதில், எனக்கு உடன்பாடு இல்லை. திறமையானவர்களை நாம் தக்கவைத்துக்கொள்ள வேண்டும்,” என அவர் வலியுறுத்தினார்.

ட்ரம்ப்பின் இந்தக் கருத்து, அவரது முந்தைய கடுமையான குடியேற்றக் கொள்கையிலிருந்து விலகிச் செல்வதாகப் பார்க்கப்படுகிறது.

எச்-1பி விசாவில் வெளிநாட்டு நபரைப் பணியமர்த்த சம்பந்தப்பட்ட நிறுவனம் 1 லட்சம் அமெரிக்க டாலர்கள் செலுத்த வேண்டும் என்று ஆரம்பத்தில் தெரிவிக்கப்பட்டதால், அதிகளவில் எச்-1பி விசா வைத்திருக்கும் இந்தியர்களுக்கு அதிர்ச்சியை ஏற்படுத்தியது.

இதையடுத்து, விசா கட்டண உயர்வு புதிதாக விண்ணப்பிப்பவர்களுக்குத்தான் பொருந்தும் என்றும், ஏற்கனவே எச்-1பி வைத்திருப்பவர்களுக்குப் பொருந்தாது என்றும் டிரம்ப் நிர்வாகம் அறிவித்தது.

இந்த நிலையில், எச்-1பி விசா கட்டண உயர்வில் இருந்து விலக்கு அளிக்கப்படுவது குறித்து அமெரிக்கக் குடியுரிமை மற்றும் குடியேற்ற சேவைகள் துறை (USCIS) ஒரு புதிய அறிவிப்பை வெளியிட்டுள்ளது. அதில் தெரிவிக்கப்பட்டுள்ளதாவது:

எஃப்-1 மாணவர் விசா அல்லது எல்-1 தொழில்முறை விசா போன்ற செல்லுபடியாகும் விசாக்களில் அமெரிக்காவில் வசிக்கும் நபர்கள், தங்களது விசாவை எச்-1பி விசா நிலைக்கு மாற்ற விண்ணப்பிக்கும்போது, உயர்த்தப்பட்ட கட்டணத்தைச் செலுத்த வேண்டியதில்லை.

தற்போது எச்-1பி விசா வைத்திருப்பவர்கள் தங்கள் நிலையைப் புதுப்பிக்க அல்லது நீட்டிக்க பழைய கட்டணத்திலேயே விண்ணப்பிக்கலாம்.

அவர்கள் அமெரிக்காவை விட்டு வெளியேறி மீண்டும் நுழைவதற்கும் எந்தத் தடையும் இல்லை. இந்த அறிவிப்பு அமெரிக்காவில் படித்து வரும் சர்வதேச மாணவர்கள் உட்பட பல்வேறு வகை விசா வைத்திருப்பவர்களுக்குப் பெரிய ஆறுதலாக அமைந்துள்ளது.