திவாலானவர் என அறிவிக்கப்பட்ட தொழிலதிபர் அர்ஜுன்லால் சுந்தர்தாஸ் என்பவரிடம் இருந்து ஸ்டுடியோ கிரீன் நிறுவனம் பெற்ற கடனை வட்டியுடன் திருப்பிச் செலுத்தினால் மட்டுமே படத்தை ரிலீஸ் செய்ய வேண்டும் என சென்னை உயர்நீதிமன்றம் முன்னதாகத் தடை விதித்திருந்தது.

இந்தத் தடையை நீக்கக் கோரி தயாரிப்பாளர் ஞானவேல்ராஜா உச்சநீதிமன்றத்தில் மனுத் தாக்கல் செய்தார்.

இந்த மனுவை இன்று விசாரணை செய்த உச்சநீதிமன்ற நீதிபதி சஞ்சய் குமார், சென்னை உயர்நீதிமன்றத்தின் உத்தரவில் தலையிட விரும்பவில்லை எனக் கூறி, மேல்முறையீட்டு மனுவைத் தள்ளுபடி செய்தார்.

கடந்த டிசம்பர் 12-ஆம் திகதி வெளியாக வேண்டிய இந்தப் படம், சட்டச் சிக்கல்களால் தொடர்ந்து தாமதமாகி வருகிறது.

உச்சநீதிமன்றத்தின் இந்த அதிரடித் தீர்ப்பால், சென்னை உயர்நீதிமன்றம் விதித்துள்ள நிபந்தனைகளை (கடனைத் திருப்பிச் செலுத்துவது) நிறைவேற்றினால் மட்டுமே படம் திரைக்கு வரும் என்ற நிலை ஏற்பட்டுள்ளது.

தயாரிப்பாளர் ஞானவேல் ராஜா அர்ஜூன்லால் சுந்தர்தாஸ் என்பவரிடம் இருந்து ஒரு குறிப்பிட்ட தொகையைக் கடனாகப் பெற்றிருந்தார்.

அந்தக் கடன்தொகை தற்போது வட்டியுடன் சேர்த்து ரூபாய் 21.78 கோடியாக செலுத்த வேண்டியுள்ளது.

வழக்கு: இந்த முழுத் தொகையையும் செலுத்தாமல் ‘வா வாத்தியார்’ திரைப்படத்தை ரிலீஸ் செய்யக்கூடாது என அர்ஜூன்லால் சுந்தர்தாஸ் சார்பில் வழக்கு தொடரப்பட்டது.

இந்த வழக்கு விசாரணையின்போது, ஞானவேல் ராஜா தரப்பு வழக்கறிஞர், ரூபாய் 3.75 கோடியை உடனடியாகச் செலுத்துவதாகவும், மீதமுள்ள தொகைக்குச் சொத்து ஆவணங்களைத் தாக்கல் செய்யத் தயாராக இருப்பதாகவும் நீதிமன்றத்தில் தெரிவித்தார்.

இந்த வாதத்தைக் கவனத்தில் கொண்ட நீதிபதி, “பல முறை வாய்ப்பு அளிக்கப்பட்டும் கடனைச் செலுத்த எந்த விதமான முயற்சியும் எடுக்கவில்லை” எனக் கூறினார்.

இதன் விளைவாக, முழுத் தொகையையும் செலுத்தும் வரை ‘வா வாத்தியார்’ திரைப்படத்தை ரிலீஸ் செய்யக்கூடாது என நீதிமன்றம் அதிரடி உத்தரவு பிறப்பித்துள்ளது.

இந்தத் திடீர் தடையால், டிசம்பர் 12ஆம் தேதி வெளியாகவிருந்த ‘வா வாத்தியார்’ திரைப்படத்தின் ரிலீஸில் பெரும் சிக்கல் ஏற்பட்டுள்ளது.