மேல் மாகாண சிரேஷ்ட பிரதிப் பொலிஸ் மா அதிபர் சஜீவ மெதவத்த இது குறித்துக் கூறுகையில், இக்கைதுக்குப் பின்னால் எவ்வித அரசியல் உள்நோக்கமும் இல்லை எனவும், தேசிய பாதுகாப்பை உறுதிப்படுத்தும் கடமையை மட்டுமே பொலிஸார் செய்வதாகவும் குறிப்பிட்டார். சுரேஷ் சலேயிடம் நடத்தப்படும் 72 மணிநேர விசாரணைகளின் போது, ஈஸ்டர் தாக்குதலின் உண்மையான சூத்திரதாரி குறித்த இரகசியங்கள் வெளிவரக்கூடும் என அவர் நம்பிக்கை வெளியிட்டார். மேலும், இவரைத் தடுத்து வைத்து விசாரணை செய்வதற்கான சட்ட ரீதியான ‘தடுப்புக்காவல் உத்தரவை’ (Detention Order) பெறவுள்ளதாகவும் டிஐஜி ஜாலிய சேனாரத்ன விளக்கமளித்தார்.

இந்தக் கைது நடவடிக்கை குறித்து முன்னாள் அமைச்சர் அலி சப்ரி மற்றும் முன்னாள் நாடாளுமன்ற உறுப்பினர் உதய கம்மன்பில ஆகியோர் கடுமையான கவலைகளை வெளியிட்டுள்ளனர். “நாட்டைப் பாதுகாத்த அதிகாரிகளை ஆதாரங்களற்ற கதைகளின் அடிப்படையில் வேட்டையாடுவது, இராணுவத்தினரின் மன உறுதியைக் குலைக்கும் செயல்” என அலி சப்ரி சாடியுள்ளார். அரசியல் போட்டிகளுக்குப் பாதுகாப்பு நிறுவனங்கள் பலியாகக் கூடாது எனவும் அவர் எச்சரித்தார்.

மறுபுறம், அரசாங்கம் தனது நிலக்கரி கொள்முதல் ஊழல் மோசடிகளிலிருந்து மக்களின் கவனத்தைத் திசைதிருப்பவே இந்த “நாடகத்தை” அரங்கேற்றுவதாக உதய கம்மன்பில குற்றம் சுமத்தியுள்ளார். ‘சனல் 4’ ஆவணப்படத்தின் ஜோடிக்கப்பட்ட கதைகளைப் பயன்படுத்திப் பழிவாங்கும் நோக்கில் இந்த நடவடிக்கை எடுக்கப்பட்டுள்ளதாகவும், ஈஸ்டர் தாக்குதலின் ஆண்டு நிறைவை ஒட்டி மக்களைத் திருப்திப்படுத்தவே இந்த நேரம் தேர்ந்தெடுக்கப்பட்டுள்ளதாகவும் அவர் மேலும் தெரிவித்தார்.