கடந்த மார்ச் 31-ஆம் திகதி இரவு, காத்தான்குடி பொலிஸ் பிரிவுக்குட்பட்ட பகுதியில் மாவட்ட குற்ற விசாரணைப் பிரிவினரால் முன்னெடுக்கப்பட்ட அதிரடிச் சோதனையின் போது இந்தக்கும்பல் சிக்கியது. இவர்களிடமிருந்து நிலத்தைத் தோண்டுவதற்குப் பயன்படுத்தப்பட்ட நவீன உபகரணங்கள் மற்றும் விசேட பூஜைப் பொருட்கள் பலவும் பொலிஸாரால் கைப்பற்றப்பட்டன. கைதானவர்கள் மொரட்டுவ, கட்டுகஸ்தோட்டை மற்றும் இங்கிரிய போன்ற பல்வேறு பகுதிகளைச் சேர்ந்தவர்கள் என அடையாளம் காணப்பட்டுள்ளனர்.

இந்த வழக்கின் மிகவும் அதிர்ச்சிகரமான அம்சம், சம்பவ இடத்திற்கு அழைத்து வரப்பட்ட 16 வயது சிறுவன் தொடர்பான பின்னணியாகும். குறித்த சிறுவன் பொலன்னறுவை பகுதியைச் சேர்ந்தவர் என்றும், அவரைப் பலிகொடுக்கும் நோக்கில் அழைத்து வந்ததாகச் சிறுவன் தரப்பு சட்டத்தரணி நீதிமன்றில் வாதிட்டார். இருப்பினும், எதிர்தரப்பு இதனை மறுத்ததுடன், அந்தச் சிறுவன் புதையல் இருக்கும் இடத்தைத் துல்லியமாகக் கண்டறியும் ஆற்றல் கொண்டவர் என்று வாதிட்டது. இந்த முரண்பட்ட வாதங்களை அடுத்து, சிறுவனைச் சிறுவர் நன்னடத்தை இல்லத்தில் பாதுகாப்பாக வைக்குமாறு நீதவான் பணித்தார்.

சோழர் ஆட்சிக் காலத்தின் வரலாற்றுச் சுவடுகளைக் கொண்ட மண்முனைப் பகுதியில் இத்தகைய அகழ்வுகள் இடம்பெறுவது, நாட்டின் தொல்பொருள் பொக்கிஷங்களுக்கு விடுக்கப்பட்ட அச்சுறுத்தலாகப் பார்க்கப்படுகிறது. சுமார் ஆயிரம் ஆண்டுகளுக்கு முன்னர் ‘நெல்லிக்குளம்’ போன்ற முக்கிய கட்டுமானங்களை அமைத்து ஆட்சி செய்த தமிழ் மன்னர்களின் தொல்பொருள் சான்றுகளைச் சேதப்படுத்தும் இவ்வாறான திட்டமிட்ட நடவடிக்கைகளுக்கு எதிராகக் கடுமையான சட்ட நடவடிக்கை எடுக்கப்பட வேண்டும் எனச் சமூக ஆர்வலர்கள் வலியுறுத்தி வருகின்றனர்.