அலோகாவின் இந்தப் பயணம் மிகவும் தனித்துவமானது. பொதுவாக விலங்குகள் விமானத்தின் சரக்குப் பகுதியில் (Cargo) கொண்டு செல்லப்படும் நிலையில், அலோகா ஒரு சான்றளிக்கப்பட்ட ‘சேவை நாய்’ (Certified Service Dog) என்பதால், மனிதப் பயணிகளுடன் விமானத்தின் பிரதான பயணிகள் அறையிலேயே (Passenger Cabin) பயணிக்க அனுமதி வழங்கப்பட்டுள்ளது. நீண்ட தூர விமானப் பயணம் முழுவதும் தனது பராமரிப்பாளர்களுடன் அமர்ந்து பயணிக்கும் இந்த அரிய சலுகை, அதன் சேவை மற்றும் முக்கியத்துவத்திற்குக் கிடைத்த கௌரவமாகக் கருதப்படுகிறது.

அமெரிக்காவின் டெக்சாஸ் மாகாணத்திலிருந்து வாஷிங்டன் டி.சி வரை சுமார் 2,300 மைல்கள் பௌத்த துறவிகளுடன் இணைந்து அலோகா மேற்கொண்ட நடைப்பயணம் சமூக வலைத்தளங்களில் கோடிக்கணக்கான மக்களின் இதயங்களை வென்றது. தற்போது அதே போன்றதொரு அமைதிச் செய்தியை இலங்கையிலும் பரப்பும் நோக்கில், அமெரிக்காவிலிருந்து 12 பௌத்த துறவிகளுடன் அலோகா இலங்கைக்கு வருகை தருகிறது. ஏப்ரல் 21-ஆம் தேதி அனுராதபுரம் ஜய ஸ்ரீ மகா போதியில் ஆசி பெற்றுத் தொடங்கும் இந்தப் பேரணி, ஏப்ரல் 28-ஆம் தேதி கொழும்பு சுதந்திர சதுக்கத்தில் நிறைவடையவுள்ளது.

இந்தியாவில் வீதியில் விடப்பட்ட ஒரு சாதாரண நாயாக இருந்து, இன்று உலகளாவிய அமைதிச் சின்னமாக மாறியுள்ள அலோகாவின் கதை, சக உயிர்கள் மீதான கருணையை வலியுறுத்துகிறது. “அமைதி என்பது மொழிகள் மற்றும் எல்லைகளுக்கு அப்பாற்பட்டது” என்ற செய்தியை அலோகாவின் மௌனமான நடைப்பயணம் பறைசாற்றுகிறது. இலங்கையின் பல்வேறு நகரங்கள் ஊடாகச் செல்லும் இந்தப் பேரணியில், அலோகாவைக் காண்பதற்கும் அதனுடன் இணைந்து நடப்பதற்கும் பெருமளவிலான மக்கள் திரள்வார்கள் என எதிர்பார்க்கப்படுகிறது.