இலங்கையிலுள்ள அமெரிக்கத் தூதரகத்துடன் இணைந்து பல்கலைக்கழக மானியங்கள் ஆணைக்குழுவினால் (UGC) முன்னெடுக்கப்படும் இந்த முயற்சி, உயர்கல்வித் துறையில் செயற்கை நுண்ணறிவைப் பொறுப்புடனும், வெளிப்படைத்தன்மையுடனும் பயன்படுத்துவதற்கான வழிகாட்டல்களை வழங்குகின்றது. அமெரிக்காவின் ஜார்ஜியா பல்கலைக்கழகத்தைச் சேர்ந்த பேராசிரியை உஸ்ரீ பட்டாச்சார்யாவின் (Prof. Usree Bhattacharya) தொழில்நுட்ப ஆலோசனையுடன் இந்த ஆவணங்கள் தயாரிக்கப்பட்டுள்ளன. இக்கட்டமைப்பானது கற்பித்தல், ஆராய்ச்சி மற்றும் பல்கலைக்கழக நிர்வாகம் ஆகியவற்றில் AI தொழில்நுட்பத்தை ஒருங்கிணைப்பதற்கான ஒரு முன்னோடி முயற்சியாகப் பார்க்கப்படுகிறது.

இந்த நிகழ்வில் உரையாற்றிய பிரதமர், “தொழில்நுட்பம் நமது புரிந்துகொள்ளும் திறனை விட அதிவேகமாக வளர்ந்து வருகின்றது. இது வாய்ப்புகளையும் அதேவேளை பல சவால்களையும் ஒருங்கே கொண்டுள்ளது. எனவே, கல்வித்துறையில் ஏற்கனவே நிலவும் ஏற்றத்தாழ்வுகளைச் செயற்கை நுண்ணறிவு மேலும் ஆழப்படுத்தாமல் இருப்பதை உறுதி செய்வது அவசியமானது,” எனக் குறிப்பிட்டார். குறிப்பாக, மாற்றுத்திறனாளி மாணவர்களுக்கு ஆதரவளிப்பதற்கும், மொழித் தடைகளைக் களைவதற்கும் இத்தொழில்நுட்பத்தை ஆக்கபூர்வமாகப் பயன்படுத்த வேண்டும் என அவர் வலியுறுத்தினார்.இந்தக் கொள்கைக் கட்டமைப்பானது எதிர்வரும் ஜூன் மாதம் முழுமையாக இறுதி செய்யப்பட்டு, அனைத்து அரச பல்கலைக்கழகங்களுக்கும் நடைமுறைப்படுத்துவதற்காக அனுப்பி வைக்கப்படும் என அறிவிக்கப்பட்டுள்ளது.

சமூக அறிவியல் மற்றும் மானுடவியல் போன்ற துறைகளில் AI ஏற்படுத்தக்கூடிய தனித்துவமான தாக்கங்களைக் கருத்தில் கொண்டு, கல்வியாளர்கள் மற்றும் மாணவர்களுடன் தொடர்ச்சியான கலந்துரையாடல்களை முன்னெடுக்குமாறும் அதிகாரிகளுக்குப் பிரதமர் அறிவுறுத்தினார். இதன் மூலம் இலங்கை தனது அறிவுசார் ஆளுமையை உலகளாவிய தொழில்நுட்ப மாற்றங்களுக்கு ஏற்ப வலுப்படுத்த முடியும் என எதிர்பார்க்கப்படுகிறது.