நெடுந்தீவில் தொல்பொருள் சுவடியை (சின்னத்தை) சேதப்படுத்திய விவகாரத்தில் இன்று (நவம்பர் 06) கைது செய்யப்பட்ட நெடுந்தீவு பிரதேச சபையின் தவிசாளர் மற்றும் ஒப்பந்ததாரர் ஆகியோர் பிணையில் செல்ல ஊர்காவற்றுறை நீதவான் நீதிமன்றம் அனுமதி அளித்துள்ளது.
நெடுந்தீவில் வெடியரசன் கோட்டை வீதி புனரமைப்பின் போது, தொல்பொருள் சின்னமாக அடையாளமிடப்பட்டிருந்த ஒரு பகுதி சேதமாக்கப்பட்டதால் இந்தச் சர்ச்சை எழுந்தது. இந்தச் சம்பவத்தின்போது நேற்றைய தினம் (நவம்பர் 05) சாரதிகள் இருவர் காவல்துறையினரால் கைது செய்யப்பட்டு பிணையில் விடுவிக்கப்பட்டிருந்தனர்.
இதன் தொடர்ச்சியாக, துறைசார் திணைக்களத்தின் நடவடிக்கையின் பிரகாரம் யாழ் மாவட்ட குற்ற விசாரணைப் பிரிவுப் காவல்துறையினர் விசாரணைகளை முன்னெடுத்தனர்.
இந்தச் சம்பவத்துடன் தொடர்புடைய குற்றச்சாட்டின் பேரில், யாழ் மாவட்ட குற்ற விசாரணைப் பிரிவுப் காவல்துறையினரால் கைது செய்யப்பட்ட தவிசாளர் மற்றும் ஒப்பந்ததாரர் ஆகியோர் ஊர்காவற்றுறை நீதவான் நீதிமன்றத்தில் முன்னிலைப்படுத்தப்பட்டனர். நீதிமன்றம் அவர்களை ஒரு இலட்சம் ரூபாய் பிணையில் செல்ல அனுமதித்துள்ளது.